ФЕВРАЛЬ АЕНА СЫНАМЫШЛАР

Кышның соңгы аена аяк бастык, җәмәгать. Димәк, февральгә багышланган халык сынамышлары белән танышыр вакыт җитте.

1. Февральдә каен ботагында карлар алка-алка булып асылынып торса, ул елда иген уңар. 
2. Февральнең беренче яртысында көннәр суык булса, арыш уңар; җылы булса, тары уңар. 
3. Февральдә бәс күп булса, агач җимешләре уңар, бал күп булыр. 
4. Февраль аенда кар күп булса, иртә җәйгә ишарә. 
5. Тау башларында кар күп булса, җиләк күп булыр. 
6. Морҗадан чыккан төтен туры булып өскә менсә, көн аяза, суыта.
7. Әгәр төтен җиргә ятса, көн җылыта. 
8. Февраль ае ахырында кар күп яуса, борчак белән чикләвек уңар. 
9. Әгәр кышның бу ае буранлы икән, августта яңгыр көт, уҗым игене уңачак. 

Көннәр белән бәйле халык сынамышлары: 

• 3 февраль салкын булса, урак вакытында бик эссе булыр. 
• 7 февраль көннең беренче яртысы ничек булса, киләсе кышның беренче яртысы шулай булыр. 
• 8 февраль йолдызлы һәм аяз төн булса, гөмбә уңышы күп булачак. 
• 9 февраль агачлар бәскә төренсә - тиздән җылытачак. 
• 12 февраль ай кызарып торса, көчле җил булачак. 
• 14 февраль күк йолдызлы булса, яз соң килер. 
• 15 февраль көнне җепшек булса, яз иртә килер һәм җылы булыр.
• 26 февраль кар эресә, сулар акса, җәй яңгырлы булыр. 
• 27 февраль җылы һава булса, март аеның башы суык булачак. 
• 28 февраль боз сөңгеләре озын икән, яз да озын булыр.