ДӨНЬЯГА БАНАН ДЕФИЦИТЫ ЯНЫЙ

Тиздән кибет киштәләрендә бананнар кимергә яки юкка чыгарга мөмкин... Ни өчен? Нәрсә булган?

Россиягә, Европа илләренә, Якын Көнчыгышка банансыз тормыш яный. Моның сәбәбе – Эквадордагы янартау (вулкан) атуы.

Сангай дип аталган вулканның атуы аркасында 55 мең гектар банан культурасы зыян күргән.

Барлыкка килгән көлдән 1,5 млн тартма җиләк-җимеш зарарланган, бу экспортка чыгарыла торган продукциянең 25−30%ы дигән сүз.

- Хәзер зыян күргән бананнарны компенсацияләү өчен хезмәткәрләр тагын да тырышыбрак эшләргә мәҗбүр, - ди кластер координаторы Хуан Хосе Понс.

Белгечләр санап чыгарган мәгълүматлар нигезендә продукциянең якынча 30% юкка чыгачак. Бананның Россиягә күбесенчә нәкъ менә Эквадордан килүен исәпкә алсак, әле банансыз да утырып калмагаек...

Сангай янартавы 20 сентябрь көнне ата башлады. Аннан чыккан төтен 10 чакрым биеклеккә менде. Торак йортлар, 83 мең гектар җирлектәге үсентеләр көл белән капланды. Гуаякиль шәһәрендәге халыкара аэропортны да вакытлыча ябып торырга мәҗбүр булдылар.