ДӘРЕСТӘН СОҢ КӨЧ КАЛСЫН ӨЧЕН НИШЛӘРГӘ?

Сәгать өч. Мәктәптән кайтып керәсең, сумкаңны бер почмакка атасың да диванга авасың. Алда әле өй эшләре, түгәрәкләр, дуслар белән очрашу, үзеңә ошаган шөгыльләр бар. Ә синең батареяң – 2%. Таныш хәлме? Дәресләрдән соң да энергияле булып калуның серен эзләп карыйк.

ЙОКЫ – СИНЕҢ ТӨП ЗАРЯДКАҢ

«Тагын бер генә видео карыйм!» дигән сүзләрнең ничек төнге икегә кадәр сузылганын сизми дә каласың. Иртән уяну авыр, дәрестә күзләр йомыла, ә өйгә кайткач бернәрсәгә дә хәл юк.

Гаҗәп түгел! 13-18 яшьлек яшүсмерләргә тәүлеккә 8-10 сәгать йокы кирәк. Йокы вакытында организм ял итә, ә баш мие көн дәвамында алган мәгълүматны эшкәртә. Шуңа күрә контроль эшкә әзерләнәм дип төне буе утыру һәрвакытта да яхшы идея түгел.

Лайфхак: йоклар алдыннан телефонны читкә алып куй. Башта ярты сәгатькә булса да. Ә иртән тору вакытың билгеле икән, кичтән ничәдә ятарга кирәклеген исәпләп кара.

АЧ КИЛЕШ ЕРАК КИТЕП БУЛМЫЙ

Иртән ашарга өлгермәдең, мәктәптә төшке ашны ошатмадың, ә өйгә кайткач печенье белән генә чикләндең, ди. Мондый режимда организмның энергиягә кытлык кичерүе гаҗәп түгел.

Безнең организмга энергия ризык белән килә. Ботка, йомырка, ит, балык, сөт ризыклары, яшелчә һәм җиләк-җимеш – болар барысы да төрле туклыклы матдәләр чыганагы.

Лайфхак: мәктәпкә үзең белән җиңелчә капкалап алырлык ризык ал. Әйтик, банан, алма, бутерброд яки чикләвек. Һәм су турында онытма! Кайчак баш авырту, хәлсезлек һәм игътибарны туплый алмау организмга сыеклык җитмәү белән бәйле булырга мөмкин.

ЯЛ ИТӘМ ДИП ТЕЛЕФОНГА ЧУММА

Дәрестән кайттың, телефонны кулыңа алдың. Бер видео, икенчесе, өченчесе... Күз ачып йомганчы бер сәгать узган! Ә син һаман арыган.

Чөнки телефонда утыру белән чынлап ял итү бер үк нәрсә түгел. Көн дәвамында баш миең бик күп мәгълүмат кабул иткән. Социаль челтәрләрдә исә ул яңадан-яңа хәбәрләр, видеолар һәм эмоцияләр белән очраша.

Лайфхак: мәктәптән соң үзеңә бераз тыныч вакыт бир. Тәрәзә янында чәй эч, яраткан музыкаңны тыңла, бераз йөреп кер. Иң мөһиме – ялны тагын бер мәҗбүри эшкә әйләндермә.

АРЫДЫҢМЫ? ХӘРӘКӘТ ИТЕП КАРА!

Кызык яңгырый, әйеме? Көчең калмаган, ә сиңа хәрәкәт итәргә кушалар!

Ләкин көне буе парта артында утырганнан соң җиңел физик активлык кәефне яхшыртырга һәм үзеңне яхшырак хис итәргә ярдәм итә ала.

Бөтендөнья сәламәтлек саклау оешмасы 5-17 яшьлек балаларга һәм яшүсмерләргә атна дәвамында көненә уртача кимендә 60 минут уртача яки югары интенсивлыктагы физик активлык тәкъдим итә.

Бу көн саен спортзалга йөрергә кирәк дигән сүз түгел. Җәяү йөрү, велосипедта җилдерү, бию, дуслар белән туп уйнау да хәрәкәт бит.

Лайфхак: мәктәптән кайтканда юлның бер өлешен җәяү үтеп кара. Әгәр үзеңне бик начар хис итәсең икән, көчләп күнегүләр ясарга кирәкми.

ИҢ МӨҺИМЕ – ҮЗЕҢНЕ ТЫҢЛА

Һәр көнне бер үк дәрәҗәдә энергияле булу мөмкин түгел. Кайчак контроль эштән соң да, күңелсез сөйләшүдән соң да, хәтта бик кызыклы көннән соң да арырга мөмкинсең.

Әгәр берничә атна дәвамында хәлсезлек бетми, гадәти эшләргә комачаулый икән, моны игътибарсыз калдырма. Әти-әниеңә яки ышанган башка олы кешегә әйт һәм табибка мөрәҗәгать ит.

Ә хәзер үзеңә бер сорау бир: «Мин бүген ниләр эшләп өлгердем?» Бәлки, син уйлаганнан да күбрәк эш башкаргансыңдыр?