БЕЗНЕҢ БУЫН НӘРСӘДӘН КУРКА?

Безне гадәттә «курыкмый торган буын» дип атыйлар. Янәсе, без иркен, без кыю, без теләсә нәрсә әйтә алабыз, теләсә кайда уйлаганны язабыз, камера алдында да оялмыйбыз. Ләкин дөресен генә әйткәндә, без курыкмый торган буын түгел. Без бары тик башка нәрсәләрдән курка торган буын.

Без караңгылыктан, укытучыдан, директордан гына куркып үскән буын түгел. Безнең куркулар катлаулырак.

Беренчесе – уңышсыз булудан курку.

Хәзер һәркем кайдадыр өлгерә, кемдер акча эшли, кемдер блог алып бара, кемдер чит илгә укырга керә, кемдер стартап ача. Социаль челтәрләрне ачасың – барысы да уңышлы, матур, акыллы, продуктив. Шушы фон артында үзеңне артта калган кебек тою бик җиңел. Шуңа күрә күпләр нәрсәдер башларга да курка: «Әгәр барып чыкмаса? Әгәр көлсәләр? Әгәр мин булдыра алмасам?»

Икенче курку – оятка калу.

Без ояла белми торган буын кебек күренәбез, ләкин чынлыкта без бик оялчан буын, бу интернетка бәйле. Бер ялгыш сүз, бер уңайсыз видео – һәм ул мәңгегә интернетта калырга мөмкин. Шуңа күрә кешеләр үз фикерен ачык әйтергә, ниндидер проект башларга, сәхнәгә чыгарга курка. Чөнки хәзер сине 20 кеше түгел, ә мең кеше тикшерә ала.

Өченче курку – ялгыз калу.

Без һәрвакыт онлайн: чатлар, сторислар, лайклар, комментарийлар. Кешеләр күп кебек, аралашу күп кебек. Ләкин күпләр эчтән ялгыз. Кайчак телефон тынгач, хатлар килми башлагач, кеше үзен кирәксез итеп хис итә. Шуңа күрә кайберәүләр мөнәсәбәтләргә дә, дуслыкка да «ялгыз калмас өчен» генә керә.

Тагын бер курку – гади тормыштан курку.

Элек кешеләр өчен гади тормыш нормаль булган: эш, гаилә, фатир, ял. Хәзер исә һәркем «үзен табарга», «яраткан эшен эшләргә», «дөньяны күрергә», «зур максатлар куярга» тиеш кебек. Гади генә яшәсәң, имеш, син кызык, бәхетле, дөрес кеше түгел. Шуңа күрә кайберәүләр гади тормыштан курка башлый: «Әгәр мин гади кеше генә булып калсам?»

Ә иң зур курку – үзең булудан куркудыр. Кешеләр еш кына үзләре теләгәнне түгел, ә мода булганны карый, тыңлый, кия, укый. Чөнки аерылып торудан куркабыз. Калганнарның көлүләреннән, аңламауларыннан, «кринж» дип әйтүләреннән куркабыз.