БЕРЬЮЛЫ БЕРНИЧӘ ВУЗДА БЮДЖЕТТА УКЫП БУЛАМЫ?

Берьюлы берничә югары уку йортында бюджетта уку күпләргә сәер тоелса да, Россия законнары моны тыймый. Әгәр студентның әле югары белем турында дипломы юк икән, ул башка вузга да бюджет нигезендә укырга керә ала.

Берничә вузда ничек укырга мөмкин?

Закон буенча студент бер үк вакытта берничә белем бирү программасын үзләштерә ала. Алар бер вузда да, төрле университетларда да булырга мөмкин. Димәк, кеше әле беренче югары белем дипломын алмаган икән, ул икенче, хәтта өченче вузга да бюджетка керә ала.

Ләкин монда мөһим шарт бар: бер үк кабул итү кампаниясе вакытында берничә бюджет урынына берьюлы ризалык биреп булмый. Ягъни бер елда ук шунда ук ике университетка бюджетка керү мөмкин түгел. Икенче вузга киләсе уку елында документ тапшырып кына кереп була.

Документлар белән ничек эшләргә?

Кабул итү вакытында гадәттә мәктәп аттестатының төп нөсхәсе кирәк була. Шуңа күрә кайбер студентлар аны вакытлыча бер вуздан алып, икенчесенә күрсәтеп кире кайтара. Шулай ук элек тапшырылган БДИ нәтиҗәләрен кулланырга мөмкин. Алар имтихан тапшырылган елдан соң дүрт ел дәвамында гамәлдә кала.

Берничә вузда укучы студент нинди хокукларга ия?

Берничә стипендия алу

Студент төрле вузларда берьюлы стипендия ала ала. Ә кайбер университетларда олимпиада җиңүчеләренә яки 100 балл җыйган укучыларга арттырылган стипендияләр һәм бер тапкыр бирелә торган премияләр дә каралган.

Армиядән кичектерү

«Хәрби бурыч һәм хәрби хезмәт турында»гы закон буенча, армиядән кичектерү бер белем дәрәҗәсенә бары тик бер тапкыр гына бирелә. Шуңа күрә студент берничә вузда укыса да, кичектерү бер программа буенча гына саклана.

Фәннәрне яңадан тапшырмаска мөмкин

Әгәр ике вуздагы программалар охшаш булса, студент кайбер фәннәрне кабат укымаска мөмкин. Моның өчен деканатка гариза һәм академик белешмә тапшырыла. Сәгатьләр һәм программа билгеле бер дәрәҗәдә туры килергә тиеш.

Беренче диплом алынгач нәрсә була?

Студент беренче югары белем дипломын алгач, башка вузлардагы укуы инде «икенче югары белем» булып санала. Димәк, калган укуын бюджетта дәвам итеп булмый, түләүле бүлеккә күчәргә кирәк була.

Грант ярдәмендә бушлай уку

Кайбер очракларда студент бер вузда бюджетта, ә икенчесендә грант хисабына укый ала. Грант – дәүләт, университет, оешма яки эш бирүче тарафыннан бирелә торган финанс ярдәме. Ул рәсми рәвештә бюджет урыны булып саналмый.

Дипломы булган кешеләр яңадан бушлай укый аламы?

Кайбер категория кешеләр икенче югары белемне дә бушлай ала ала. Мондый мөмкинлек түбәндәгеләргә каралган:

• беренче белемне хәрби вузда алган кешеләргә;
• 18 яшьтән соң инвалидлык алган кешеләргә;
• мәдәният һәм сәнгать өлкәсендәге кайбер иҗади белгечлекләргә керүчеләргә.

Мәсәлән:

• театр режиссурасы;
• әдәби иҗат;
• кино һәм телевидение режиссурасы;
• композиция;
• музыкаль тавыш режиссурасы һәм башка иҗади юнәлешләр.