Яшүсмерләргә мәктәптә хезмәт хакы түләячәкләр

Быел җәй көне Казан мәктәпләрендә яшүсмерләргә эш урыннары тәкъдим ителәчәк. Алар мәктәп янын яшелләндерү, китапханә фондын рәткә китерү, мәктәп лагерьларында тәрбия эшләре алып бару белән шөгыльләнәчәк.

Мәктәпләрдә барлыгы 1,1 мең эш урыны оештырылыр дип уйланыла. Укучыларга хезмәт хакы түләү өчен шәһәр бюджетыннан барлыгы 10 миллион сум акча бүлеп биреләчәк. 14-15 яшьлек үсмерләр көненә 3 сәгать эшләячәк һәм кулларына 5,3 мең сум акча алачак. 16-17 яшьлек өлкән сыйныф укучылары исә көненә 6 сәгать эшли. Аларга 6 мең сум хезмәт хакы түләнергә тиеш.