«ЯНДЕКС»ның ОНЛАЙН-МӘКТӘБЕНДӘ НИЧӘ ПРЕДМЕТ БУЕНЧА УКЫП БУЛАЧАК?

“Яндекс” ширкәте Педагогик осталык үзәге белән берлектә бушлай онлайн-мәктәбен башлап җибәрде. Видеодәресләр 9.00-14.00 сәгать аралыгында узачак. Ә өйрәнелә торган дисциплиналар 15 предметны колачлый.

Булдырылган контентны укытучыларга үз уку программаларында кулланырга мөмкин. Мөгаллимнәр шулай ук дәресләрнең онлайн-трансляцияләре һәм кече сыйныфлар өчен биремнәрне автоматик тикшерү өчен махсус платформага да ия булачак. Моннан тыш, онлайн-мәктәпкә БДИ һәм ТДИга әзерлек өчен өстәмә дәресләр кертелгән.

Видеодәресләр “Яндекс. Эфир”да трансляцияләнәчәк, аларны, шулай ук, соңрак та карап була. Бер атналык архив һәр җомга куелачак. Көнгә 4-6 дәрес булачак. Ә дәресләр расписаниесе бер атна алдан сайтта (расписаниега сылтама) урнаштырылачак.

Онлайн-мәктәптә 100дән артык укытучы белем бирә. Алар барысы да дәреслекләр, методик әсбаплар авторлары, БДИ экспертлары, олимпиадаларны оештыручылар. Көн саен 45 видеодәрес әзерләнә.