ЯҢА УКУ ЕЛЫН 1 ОКТЯБРЬГӘ КҮЧЕРМӘКЧЕЛӘР

Россия Дәүләт Думасы депутаты Василий Власов яңа уку елын 1 сентябрьдә түгел, ә 1 октябрьдә башларга тәкъдим итә. Әлеге тәкъдимне ул Россия Мәгариф министры Сергей Кравцовка җибәргән.

“Россиядә көн саен коронавирус инфекциясенең 5 меңнән артык очрагы ачыклана. Өстәмә ай социаль контактларның кискен  үсешен киметергә ярдәм итәчәк, ковидның зур тизлек белән таралуына юл куймаячак. Шулай ук балалар һәм әти-әниләрнең төрле медицина тестлары тапшыру өчен вакытлары күбрәк булачак”, - дип белдерә Василий Власов.

Хәзер Россиядә яңа уку елы һәрвакыттагыча 1 сентябрьдә башланыр дип көтелә. Мәктәпләр яңача эшләячәк: тән температурасын үлчәү, көчәйтелгән дезинфекция мәҗбүри. Моннан тыш, балалар бер кабинеттан икенчесенә күчеп йөри алмаячак.