«ВКОНТАКТЕ» ТАТАРЧА ПРОЕКТЛАРГА ГРАНТЛАР ӨЛӘШӘ

«Вконтакте» социаль челтәре татар телле контентны популярлаштыру, арттыру максатыннан шундый карарга килгән. Иң яхшы өч проект махсус грантларга ия булачак. Гомуми сумма – 500 мең.

– Без туган телдәге проектларга ярдәм итәргә, аларның рус телле зур проектлар арасында югалып калуларына юл куймаска булдык. Татар телле контентны тагын да сыйфатлырак итү – тагын бер мөһим максатларның берсе, - дип ассызыклый “Вконтакте”ның Татарстандагы вәкиле Диләрә Махиянова.

Грантлар өләшүдән тыш, бәйгедә катнашучы проектлар өчен уку-укыту эшчәнлеге дә оештырылачак. Киләчәктә бу программа башка телдәге проектлар арасында да уза башлаячак.

Бәйгенең уку-укыту өлеше 20 октябрь - 10 ноябрь көннәрендә узачак. Аның кысаларында социаль челтәрдә эшләүчеләр конкурс катнашучыларын алгоритмнардан файдаланырга, инструментларны нәтиҗәле итеп кулланырга өйрәтәчәк.