V КАЗАН ГЛОБАЛЬ ЯШЬЛӘР САММИТЫНДА БИШ АЧЫК СЕССИЯ УЗАЧАК

V Казан глобаль яшьләр саммиты кысаларында шәһәр халкы һәм туристлар өчен биш ачык сессия оештырылачак.

Беренче очрашуның төп кунагы – коммуникацияләр буенча эксперт, блогер һәм онлайн сөйләм мәктәбе нигезләүче Седа Каспарова.

28 августта сәгать 10:00дә Уникаль осталык үзәгендә ул «Киләчәк компетенциясе буларак коммуникация: үзгәрешләр чорында сине ничек ишеттерергә?» дип исемләнгән остаханә үткәрәчәк.

Седа Каспарова ясалма интеллект үсеш алган чорда да әһәмиятен югалтмаган күнекмәләр, сөйләм ярдәмендә идеяләрне гамәлгә ашыру һәм кешеләрне берләштерә белү турында сөйләячәк. Ул шулай ук ышанычлы чыгыш ясау өчен файдалы киңәшләр бирәчәк.

Остаханәдән соң «Глобаль үзгәрешләр чорында мәгариф: тотрыклы үсеш өчен кадрлар» ток-шоуы узачак. Анда Седа Каспаровадан тыш, 2007 елгы Нобель тынычлык премиясе лауреаты Рэ Квон Чунг, Согуд Гарәбстанының элемтә һәм мәгълүмати технологияләр министры урынбасары Сафа Аль-Рашед һәм Novakid онлайн-платформасы җитәкчесе Максим Азаров катнашачак.

Очрашуны «Нәрсә? Кайда? Кайчан?» уены командасы капитаны Алена Повышева алып барачак. Катнашу өчен алдан теркәлергә кирәк.

V Казан глобаль яшьләр саммиты Татарстанда 26–30 август көннәрендә узачак. Быелгы төп тема – «Глобаль үзгәрешләр чорында мәгариф: тотрыклы үсеш өчен кадрлар».

Саммитка 40 илдән якынча 250 делегат килүе көтелә. Алар арасында министрлык һәм халыкара оешма вәкилләре, югары уку йортлары җитәкчеләре, экспертлар, яшь лидерлар һәм блогерлар булачак.