ТАТАРСТАНДА ИМТИХАН ҮТКӘРҮ ПУНКТЛАРЫН ҖИҺАЗЛАУГА 300 МЛН СУМНАН АРТЫК АКЧА БҮЛЕП БИРЕЛГӘН

Татарстанда төп дәүләт имтиханнары (ОГЭ) һәм бердәм дәүләт имтиханнары (ЕГЭ) үткәрү пунктларын заманча техника белән тәэмин итү өчен республика бюджетыннан 300 млн сумнан артык акча юнәлдерелгән. Бу хакта «Татар-информ» мәгълүмат агентлыгында узган матбугат конференциясендә Татарстан Мәгариф һәм фән министрлыгының урынбасары Минзәлия Закирова хәбәр итте.

Аның сүзләренчә, имтихан кампаниясе елдан-ел технологик яктан катлаулана бара, шуңа күрә җиһазларны яңарту һәм белгечләрне укыту өчен зур күләмдә инвестицияләр кирәк.

«Имтиханнарны үткәрү системасы даими рәвештә камилләшә. Җиһазларны модернизацияләү, кадрларны әзерләү зур чыгымнар таләп итә. Республика Рәисе Рөстәм Миңнеханов ярдәме белән бу юнәлештә кирәкле финанслар бүленде», – дип билгеләп үтте ул.

Проект кысаларында республика буенча имтихан пунктларын җиһазлау өчен 3,5 мең принтер һәм 400 сканер сатып алынган. Хәзерге вакытта аларны муниципалитетларга кайтару һәм урнаштыру эшләре бара.

Дәүләт йомгаклау аттестациясен үткәрү барышында имтихан материаллары сакланган интернет челтәре аша җибәрелә. Аннары алар турыдан-туры имтихан үткәрү аудиторияләрендә бастырыла һәм сканерлана.