Татарстанда 120дән артык укучы «Мәктәп бизнес-старты» финалында катнашты

Финалга Казан, Минзәлә, Буа, Кама Тамагы, Теләче, Тәтеш, Бөгелмә һәм Сарман районнарыннан 12 команда чыкты. Яшь эшмәкәрләр экологик продукция җитештерү, балалар үсешенә ярдәм итүче мини-роботлар ясау, GPS-трекерлы аксессуарлар булдыру кебек проектлар тәкъдим итте. Шулай ук татар печеньесы пешерү, милли орнаментлы киемнәр тегү кебек милли традицияләрне заманча бизнес белән бәйләгән идеяләр дә игътибар үзәгендә булды.

Татарстан икътисад министрының беренче урынбасары, Эшмәкәрлекне үстерү департаменты директоры Наталья Кондратова билгеләп үткәнчә, проект укучыларга финанс грамоталылыгы, командада эшләү, үз идеясен тәкъдим итү һәм экспертлар алдында яклау күнекмәләрен үстерергә ярдәм итә. Аның сүзләренчә, мондый тәҗрибә яшүсмерләргә киләчәк һөнәрләрен аңлырак сайларга һәм эшмәкәрлек юнәлешендә беренче адымнар ясарга мөмкинлек бирә.

Финал нәтиҗәләре буенча Минзәлә, Буа һәм Сарман районнары командалары өч номинациядә җиңү яулады. Аларга «Сколково» инновацион үзәгенә һәм Мәскәүнең башка технологик мәйданчыкларына сәяхәт итү мөмкинлеге биреләчәк. Җәлил бистәсенең 2нче урта мәктәбе һәм Казанның 146нчы лицее эшмәкәрлек күнекмәләрен үстерүгә юнәлтелгән сертификатлар алды.

«Мәктәп бизнес-старты» проекты Татарстан Рәисе йөкләмәсе буенча өченче ел рәттән үткәрелә. 2022–2025 елларда анда 45 меңнән артык укучы катнашкан, шуларның 21 меңнән артыгы — авыл һәм кече шәһәр мәктәпләре вәкилләре.