ТАТАРСТАН ПЛЯЖЛАРЫ КАЙЧАН АЧЫЛА?

Белүебезчә, Татарстанда әлегә пляжларда ял итү тыелган, алар рәсми рәвештә ачылмады. Кайчан ачылачак соң?

Пляжларның һаман да ачылмавының сәбәбе коронавирус кына түгел. Тагын бер сәбәп – ул мондый урыннарның су коену өчен яраклаштырылган булмавы.

Татарстан президентының матбугат хезмәте җитәкчсес Лилия Галимова пляжларның кайчан ачылачагы турында сөйләде.

- Куркынычсызлык мәсьәләләрен чишеп бетерәсе бар. Алар хәл ителмичә, пляжлар ачыла алмый, - ди ул, - су коену сезоны коронавирус аркасында гына түгел, ул урыннардагы куркынычсызлыкны тәэмин итү өчен дә кичектерелә. Ел саен әлеге ял итү урыннары Роспотребнадзор тарафыннан тикшерелә.

- Узган ялларда гына да сулыкларда куркынычсызлык кагыйдәләре үтәлмәү сәбәпле, 10 кешебезне югалттык. Моның сәбәбе – су коену өчен туры килмәгән урыннарга бару, аларда су коену тыелган, - ди Галимова.

Татарстанда су коену кагыйдәләрен бозу очракларын ачыклау өчен зур рейдлар узды. Пляжлар рәсми рәвештә ябык булса да, җәй башыннан бирле республикада 36 кеше батып үлде, аларның 3 се – балалар.