ТАТАРСТАН ЯШЬЛӘРЕН ЭЗТАБАР ОТРЯДЛАРЫНЫҢ ОКРУГ СЛЕТЫНДА КАТНАШЫРГА ЧАКЫРАЛАР

Идел буе федераль округында «Беркем дә онытылмый» эзтабар отрядларының округ слеты оештырыла. Төбәк этабы сентябрьгә кадәр дәвам итәчәк, ә округ слеты 2026 елның 14–17 октябрендә Түбән Новгород өлкәсендә узачак. Әлеге чара ИФОда 2014 елдан бирле үткәрелә. Катнашырга 16 яшьтән 30 яшькә кадәрге эзтабарлар чакырыла.

Слет программасына команданың визит карточкасы, кыр сезоны нәтиҗәләре буенча экспозиция, хәрби-тарихи викторина, топография һәм урынны ориентирлау, архив эзләнүе, беренче ярдәм күрсәтү, эзтабарлар викторинасы һәм куркынычсызлык техникасы, шулай ук кыр һәм эзләү эшләрен үткәрү һәм документлаштыру тәртибе керә.

Проектның максаты — ИФО төбәкләре яшьләрендә патриотик кыйммәтләр формалаштыру, округта эзтабарлар хәрәкәтен хуплау һәм үстерү.

Татарстан Республикасы яшьләр эшләре министры урынбасары Владислав Усанов билгеләп үткәнчә, һәр гаиләдә Бөек Ватан сугышы елларында сугыш кырларында Ватанны саклаган геройлар һәм Җиңүне якынайткан тыл хезмәтчәннәре бар. Аның сүзләренчә, һәр кеше тарихи хәтерне саклаучы булып тора, ә эзтабарлар хәрәкәтенең мөһим миссиясе — бабаларыбыз, аларның Ватан һәм дәүләт иминлеге, бәхетле тормышы хакына кылган батырлыклары турындагы истәлекне йөрәкләрдә саклау.

Олег Машковцев ассызыклаганча, тәрбия эше белем бирү процессының аерылгысыз өлеше булып тора һәм укучы шәхесен һәрьяклап формалаштыруга ярдәм итә. Югары уку йортларында һәм урта һөнәри белем бирү оешмаларында тәрбия өчен җаваплы кешеләрнең үзара хезмәттәшлек структурасын булдыру буенча зур эш башкарылган. Төп бурыч — яшьләргә җәмәгать активлыгының төрле төрләрендә катнашу мөмкинлеге тудыру. Шуңа күрә мәгариф оешмаларының округ җәмәгать проектларын гамәлгә ашыруда актив катнашуы һәм үз базаларында гомумроссия җәмәгать структураларын — Беренчеләр хәрәкәтен, Россия студентлар отрядларын, Россия эзтабарлар хәрәкәтен, студентлар спорт клубларын һәм башкаларны үстерүгә мөмкин кадәр ярдәм итүе мөһим.