СТУДЕНТЛАРГА ТӨШКЕ АШКА – МИЛЛИ РИЗЫК

Шушы көннәрдә Казан үзәгендә студентлар өчен махсус хәләл кафе ачылачак. “Бәяләр һәр студент өчен кулай булачак”, – дип ышандыралар биредә.

“Түбәтәй” татар милли ризыкларының хәләл челтәре халык арасында күптән популярлашты. Тик тиздән ул барлык студентларның яраткан урынына әверелергә мөмкин. Шәһәр үзәгендә студентлар өчен махсус хәләл кафе ачыла. Оештыручылар кунакларны татар милли ризыкларының яңача пешерелгән вариантлары белән шаккаттырачак. Тамак ялгап алудан тыш, биредә коворкинг зонасы, намаз уку бүлмәләре дә булачак.