САК БУЛЫГЫЗ! Синоптиклар шторм турында кисәтә!

Татарстанның Гидрометеорология үзәге шторм турында кисәтә. Якындагы берничә сәгатьтә республикада яшен, көчле яңгыр һәм җил көтелә.

Синоптиклар фаразы буенча якындагы 1-3 сәгатьтә республикада һава торышы кинәт кенә үзгәрәчәк. Яшен, көчле яңгыр, хәтта боз явуы ихтимал. Җил тизлеге секундына 15-20 метр булачак. Кайсыбер урыннарда секундына 24 метрга да җитәргә мөмкин.

Гомумән, синоптиклар халыкны бүген кичке 23:00 гә кадәр сак булырга чакыра. Шторм турында кисәтү дә шушы вакытка кадәр гамәлдә.