Логотип Идель
Белми калма

РӨСТӘМ МИҢНЕХАНОВ ЯШЬ ГЕОЛОГЛАРНЫҢ VIII РЕСПУБЛИКА АЧЫК КЫР ОЛИМПИАДАСЫН АЧУ ТАНТАНАСЫНА КИЛДЕ

Татарстан Республикасы Президенты Рөстәм Миңнеханов Яшь геологларның VIII Республика ачык кыр олимпиадасын ачу тантанасында катнашты. Чара Әлмәттә «Татнефть» ГАҖнең «Солнечный» балалар сәламәтләндерү лагере базасында уза.

«Яшь геологлар олимпиадасын ачу тантанасында катнашу – безнең өчен зур дәрәҗә. Татарстанда нефть сәнәгате үсеш алган. Һәм бу тармакта иң мөһиме – кешеләр, үз эшләренең белгечләре. Геологларны мәктәп эскәмиясеннән әзерләргә кирәк. Бүген сез башкара торган эш – илебезнең нефть тармагының киләчәге», – дип ассызыклады Рөстәм Миңнеханов.

Ул билгеләп үткәнчә, бүген геология өлкәсендә белгечләргә яңа таләпләр куела. «Запаслар бетә, яңа технологияләр кирәк. Бу шартларда геология фәне нигез булып тора. Олимпиада тиешле дәрәҗәдә оештырылыр дип өметләнәм. Сезгә уңышлы чыгышлар телим», – дип мөрәҗәгать итте ТР Президенты катнашучыларга.

«Татнефть» ГАҖ генераль директоры Наил Маганов сүзләренчә, геологлар – нефть чыгару тармагында иң кирәкле белгечләр. Ул шулай ук киләсе елда Әлмәттә яшь геологларның Бөтенроссия ачык кыр олимпиадасы узачагын да хәбәр итте.

Олимпиадада катнашу өчен Әлмәткә Татарстан, Кырым, Пермь, шулай ук Беларусь, Казахстан һәм Үзбәкстаннан 36 команда килгән. Яшь геологлар 12 бәйге сынавында ярышачак.

Фотолар ТР Президентының рәсми сайтыннан алынды

 

Следите за самым важным и интересным в Telegram-каналеТатмедиа

Нет комментариев