Россиядәге 3400 мәктәпнең бәдрәфе... урамда!

Россия мәгариф һәм фән министры Ольга Васильева Федерация Советындагы «хөкүмәт сәгате» вакытында Россиядә 3400 мәктәпнең бәдрәфләре урамда, дип белдергән. Моның турында Regnum агентлыгы хәбәр итә.

– Кызганыч, бездәге 3400 мәктәпнең бәдрәфләре – урамда. Якынча 2000 мәктәптәге бәдрәфләрдә такталарны терәтеп куялар. Ләкин без булдыра алган кадәр төзибез. Бу четерекле мәсьәлә турында беләбез, – ди министр.

Бу өлкәдәге иң проблемалы төбәк Тыва республикасы икән. Анда мәктәпләр өчәр сменада эшли. Авыл мәктәпләренең күбесендә җылы бәдрәф юк.

Сүз уңаеннан, быелның август ае ахырында министр Россиянең 2700 мәктәбендә җылы бәдрәф, канализация һәм үзәк җылыту системасы булмавы турында әйткән иде.