Рамил Закиров: «Өйдә утырып кына киләчәккә юл салынмый»

Җырчы Рамил Закиров бүгенге көнне бәйрәм кебек кабул итә. Кечкенәдән шулай тәрбияләделәр, дип сөйләде ул безгә.

– Өйдә утырып кына киләчәккә юл салынмый, "йөргән таш шомара" диләр бит. Ничек фикерлисең, ничек уйлыйсың – шулай сайла. Мин тавыш бирдем, син сайладың, ул да сайлады – инде менә өч тавыш. Ә тамчыдан күл җыела. Яшьләрдә актив гражданлык позициясе тәрбияләү дигәндә, озак уйлыйсы юк. Тәрбия ул олырак буыннан килә, алар ничек тәрбияли – шуның нәтиҗәсен күрәсең. Минем әти-әнием сайлауларга гел йөрде, бәйрәм шикелле көтеп ала идек. Шуңа хәзер мин дә сайлауларга гел йөрергә кирәк дигән фикердәмен.

Исегезгә төшерәбез: Республикада барлыгы 6 округ сайлау комиссиясе һәм 2817 участок сайлау комиссиясе. Үзәк сайлау комиссиясе мәгълүматлары буенча, бүгенге сайлауларда Татарстан Республикасыннан 2,933 млн сайлаучы катнашырга тиеш.

Россия Президентына кандидатлар: Сергей Бабурин, Павел Грудинин, Владимир Жириновский, Владимир Путин, Ксения Собчак, Максим Сурайкин, Борис Титов, Григорий Явлинский.

Сайлау бүлекчәсенә паспорт белән килү зарур.