ПСИХОЛОГИК КЛИНИКА ҺӘМ КАЙНАР ЛИНИЯ: КФУ СТУДЕНТЛАРГА ЯРДӘМ ИТӘЧӘК

КФУда студентларга ярдәм итү өчен психологик клиника барлыкка киләчәк. Әлеге проект психология һәм мәгариф институты тарафыннан быел ук гамәлгә ашырылачак. Хәзер һәр теләгән студент өчен дә махсус тренинглар инде әзер. Ә 2023 елда кайнар линия дә булыр дип көтелә.

Бирегә студентлар адаптация, өлгереш һәм сәләтләрне үстерү белән бәйле мәсьәләләр буенча мөрәҗәгать итә алачак. Шулай ук белгечләр төрле психик һәм психологик тайпылышлар, шәхси һәм гаилә кыенлыклары булса да, ярдәм итәчәк, дип белдерелә университетта. Әле тагын аралашу күнекмәләрен, лидерлык сыйфатларын үстерү һәм ораторлык сәнгате буенча терапия да үткәреләчәк.