МӘКТӘПКӘ ӘЗЕРЛЕК: ӘТИ-ӘНИЛӘР НӘРСӘГӘ АКЧА КЫЗГАНА?

Быел Россиядә әти-әниләр балалар киеменә чыгымнарны киметеп, китаплар алуга акчаны күбрәк тота башлаган. Бу турында ТАСС хәбәр итә.

Узган ел белән чагыштырганда, быел әти-әниләр балаларының кием-салымына 16%ка кимрәк акча тотсалар, китапларга чыгымнар исә 10%ка арткан. Шуңа өстәп, канцелярия кирәк-яракларына да чыгымнар шактый кимегән.

Быел әти-әниләр кием-салымга гына түгел, Белем бәйрәменә чәчәкләргә дә чыгымнарны киметкән. "Россия теплицалары" ассоциациясе хәбәр итүенчә, быел 1нче сентябрьгә гөлләмәләр, чәчәкләр  10-15%ка азрак сатылган. Шулай ук, гөлләмәләрне экзотик чәчәкләрдән ясаучылар да калмаган диярлек, ул гына да түгел, гөлләмәләрдә чәчәкләр саны да кими төшкән. Моны белгечләр халыкның сатып алу мөмкинлеге кимү белән аңлата.