МИНЗӘЛӘ ТЕАТРЫ КАЗАНГА 3 СПЕКТАКЛЬ АЛЫП КИЛӘ

С. Өметбаев исемендәге Минзәлә дәүләт татар драма театры Казанга өч көнлек гастрольләргә килә.

Театр сөюче тамашачыларга 15 февральдә Казанның 2 нче номерлы гимназиясендә Муса Җәлилнең туган көне уңаеннан «Онытмаска иде үткәнне» әдәби-драматик спектакле күрсәтеләчәк.

«Муса Җәлил белән Минзәлә шәһәре бик бәйле. Күпләр, яшьләр бигрәк тә, Муса Җәлилнең Минзәләдә 56 көн укыганын белми. Минзәлә халкы шагыйрьне сугышка озата. Шушы көннәр эчендә Муса Җәлил безнең актерларыбыз белән очрашып, шигъри кичәләр оештыра торган була», – дип бүлеште театр директоры Илнур Ганиев.

Гастрольләрнең икенче көнендә, 16 февральдә исә Камал театры сәхнәсендә Минзәлә артистлары «Шулай булды шул» мелодрамасын, ә 17 февральдә шунда ук «Ситса туй» моңсу комедиясен тәкъдим итәчәк.