Метеорологлар: Казанда кар явачак

Татарстанга куәтле салкын циклон якынлашуын республика Гидрометеорология һәм әйләнә-тирә мохитне күзәтү үзәге белгечләре кисәткән иде. Метеорологлар көчле, урыны белән тизлеге секундына 22 метрга җиткән җил, юеш кар гына түгел, җиргә вакытлыча кар катламы яту ихтималын да хәбәр итте.

Синоптиклар исәбе буенча, Татарстанда иң күп явым-төшем пәнҗешәмбе - 20 апрельдә, республикага циклонның үзәк өлеше килеп җиткәч булачак. 21 апрельгә кадәр көндезге температура, метеорологлар фаразлавынча, 5 градустан артмаячак, һәм күбесенчә ноль турысында торачак, ә төнлә урыны белән -6 градуска кадәр төшәчәк. Өч көн дәвамында юлларда бозлавык булыр дип көтелә. Ялларга явым төшем кимиячәк, ләкин урыны белән сакланачак.

Игътибарлы һәм сак булыгыз! ТР буенча Россия МЧС баш идарәсенең ышаныч телефоннары: 8(843)227-46-96; 101

//Татар-информ//