МӘКТӘПЛӘРДӘ СОЦИАЛЬ КҮНЕКМӘЛӘР ӨЙРӘТҮ КУРСЫН КЕРТЕРГӘ ТӘКЪДИМ ИТӘЛӘР

Россия мәктәпләрендә 4–8 класс укучылары өчен социаль күнекмәләрне өйрәтү курсы кертелергә тиеш. Бу тәкъдимне Общественная палата секретаренең урынбасары Владислав Гриб җиткерә, дип хәбәр итә РИА Новости.

Гриб сүзләренә караганда, мәктәп программасында күп кенә мәҗбүри предметлар булуга карамастан, заманча балаларга фәкать теоретик белем генә түгел, ә реаль тормышта кирәкле булган практик күнекмәләрне дә үзләштерү мөһим. Ул шулай ук социаль компетенцияләрне үстерүгә зур игътибар бирергә кирәклеген билгеләде, бу, үз чиратында, акчалар белән эш итү һәм көндәлек тормыш һәм финанс мәсьәләләрен белү күнекмәләрен үз эченә ала. Аерым алганда, шәхси бюджетны планлаштыру һәм көндәлек финанс операцияләрен аңлау турында сүз бара.

Общественная палата вәкиле билгеләп үткәнчә, киләчәк курс көндәлек тормыш белән бәйле берничә юнәлешне үз эченә алырга мөмкин. «Финанс грамоталылыгы белән беррәттән, мәктәпләр өчен вакыт белән идарә итү курсы, дөрес туклану һәм сәламәт яшәү рәвешен пропагандалау кертелергә мөмкин», – дигән Гриб.

Аның фикеренчә, иң уңайлы чор – 4-8 класслар арасында булырга тиеш, чөнки бу яшьтә балалар беренче финанс карарларын кабул итә башлыйлар.

Тәкъдим ителә торган яңа предмет башлангыч этапта факультатив дәресләр буларак кертелергә тиеш. Шул ук вакытта мәктәп укучыларының яшь үзенчәлекләренә туры китереп махсус уку китаплары, методик материаллар һәм мәгариф программалары эшләү планлаштырыла. Әгәр курс үзенең нәтиҗәлелеген һәм популярлыгын күрсәтсә, аны киләчәктә мәҗбүри мәктәп программасына аерым дисциплина буларак кертергә яки инде булган предметларга өлешчә кертеп интеграцияләргә мөмкин.