Мәктәпләрдә яңа вазыйфа кертмәкчеләр

Россиянең эчке эшләр министрлыгы мәктәпләрдә яңа вазыйфа булдыру турында тәкъдим керткән. Бу проект тормышка ашса мәктәпләрдә белем бирү процессы иминлеге буенча директор урынбасары дигән яңа хезмәткәрләр пәйда булачак.

Эчке эшләр министрлыгы белгечләре фикеренчә, мәктәпләрдә куркынычсызлык чаралары - видеокүзәтү, металлэзләгеч рамкалар, сак оешмалары өчен җаваплы аерым кешеләр булу мөһим. Болардан тыш яңа урынбасар белем бирү оешмаларында көч куллану очраклары белән дә көрәшергә, башка хокук бозу очракларын да контрольдә тотарга тиеш булачак. Гадәттән тыш очракларда тиз арада проблеманы хәл итү дә, ата-аналар һәм укучылар белән иминлек буенча профилактика эшләре уздыру да аның өстендә булачак.

Ничек уйлыйсыз, безнең мәктәпләргә мондый яңа хезмәткәр кирәкме?