ЛАЕШ ГИМНАЗИЯСЕНДӘ ТЕРРОРЧЫЛЫК АКТЛАРЫ НӘТИҖӘСЕНДӘ ҺӘЛАК БУЛГАННАРНЫ ИСКӘ АЛДЫЛАР

Лаеш шәһәренең 1 нче гимназиясендә террорчылыкка каршы бердәмлек көненә багышланган истәлекле линейка узды. Бу хакта «Камская новь» хәбәр итә.

Чарада Татарстан Республикасы Мәгариф һәм фән министрлыгының өстәмә белем һәм балаларга тәрбия бирү бүлеге башлыгы Анастасия Туманова, «Балачак навигаторлары» Бөтенроссия проектының төбәк координаторы вазыйфаларын башкаручы Айрат Гайфуллин һәм Лаеш районы башлыгы ярдәмчесе Наталья Лицова катнашты.

2004 елның 3 сентябрендә Беслан шәһәрендә мәктәптә зур теракт була, аның нәтиҗәсендә 334 кеше һәлак була, шуларның 186сы – балалар. 2005 елдан бирле бу көн Россиядә Террорчылыкка каршы көрәштә теләктәшлек көне буларак билгеләп үтелә. Һәлак булганнарны бер минут тынлык белән искә алдылар.

Чара кысаларында гимназистлар һәм кунаклар «Капля жизни» акциясендә катнаштылар, символик рәвештә чәчәкләргә су сибеп, фаҗига корбаннарын искә алдылар. Башлангыч сыйныф балалары Алдынгылар хәрәкәте активистлары белән бергә террорчылык куркынычы булганда үзеңне тоту кагыйдәләрен кабатладылар.

Моннан тыш, «Орлята России» остазлары җитәкчелегендә «Тынычлык күгәрчене» акциясе кысаларында оригами, кәгазь кошлар ясадылар. Шулай ук укучыларга «Интернет» челтәрендә куркынычсызлык кагыйдәләре турында тематик видеороликлар күрсәттеләр.