Кызыл аттестатка ия булыр өчен БДИны күпмегә тапшырырга кирәк?

Элек мәктәпне тәмамлаганда, алтын медаль алыр өчен, имтиханнарны ничәлегә тапшыруың мөһим түгел иде. Тик хәзер чыгарылыш кичәсенә кулыңа кызыл аттестат тотыйм, дисәң, шактый тир түгәргә туры киләчәк. Моңа кадәр “Ялкын” бу теманы күтәргән иде инде.

Бу яңалыкны ничек кенә тырышсаң да, берничек тә үзгәртеп булмый. Чөнки ул Россиянең Мәгариф министрлыгы тарафыннан кабул ителгән. Үзгәрешләр быелның 27нче гыйнварыннан гамәлгә кергән.

Хәзер мәктәпне тәмамлаганда кызыл аттестат алу өчен өстәмә таләпләр кертелгән. Бары тик бөтен фәннәр буенча да “5”ле билгесе булган, шул ук вакытта рус теле һәм математиканың профиль дәрәҗәсеннән 70 баллдан да азрак җыймаган яки математиканың база дәрәҗәсен “5”легә тапшырган укучыларга гына бирелә. Моңа кадәр кызыл аттестат алу өчен укуны “5”ле билгесенә тәмамлау, имтиханнарны уңышлы итеп тапшыру да җитә иде.