«КОРБАН-ФЕСТ» БӘЙРӘМЕНДӘ БЫЕЛ НИЛӘР БУЛА?

Быел барлык мөселманнарның изге бәйрәме, Корбан гаете, 6 июнь, җомга көненә туры килә. Елдагыча шушы уңайдан Казаныбызда зур чара – «Корбан-Фест узачак». Бәйрәм кайда була, кунакларны ни көтә? Бу хакта матбугат конференциясендә хәбәр иттеләр.

«Корбан-Фест» бәйрәме быел 6 июнь көнне 14:00-18:00 сәгатьләрдә олылар өчен Казансу яр буенда, балаларга – «Елмай» паркында узачак. Бу чара бик масштаблы, күңелле булыр ди оештыручылар.

«Ният» фонды башкарма директоры Нияз Усманов:

«Бу фестивальне карарга, безнең тәҗрибәне алырга башка төбәкләрдән киләләр. Мин бу хакта горурланып әйтә. Корбан гаетен бу кадәр зур итеп үткәрү әлегә бездә генә, башкалар кабатлый алганы юк», – дип искәртте.

«КОРБАН-ФЕСТ»ТА НИЛӘР БУЛА?

• Сәхнәдә халык артистлары чыгышы, заманча җырлар.
• Фуд-корт зона.
• Хедлайнер – Салават Фәтхетдинов.
• Хатын-кызларга «Татар кызы» дип исемләнгән лекторий булачак. Аерым будка торачак, лекцияләр 2дә башлана, һәр сәгать саен бер кеше сөйли. Барлыгы – 6 лектор. Тематикаларга килгәндә: медицина, психология, балалар белән мөнәсәбәтләр, танылган татар хатын-кызлары турында чыгышлар һәм леторийга бер блогер чакырулы.
• Трюклар, циркачлар һәм жонглерлар чыгышы, балаларга аквагрим, атынчыклар зонасы.
• Яулык бәйләргә өйрәтү остаханәсе һәм һәр кызга яулык бүләккә бирелә.
• Егетләргә «полоса препятствий» ярышлары узачак, шәп бүләкләр оту мөмкинлеге.
• 150ләп сату ноктасы.
• Милли элементлар, кием, аксессуарлардан килгән кешеләргә алма бүләккә.
• Балалар өчен көрәш ярышлары узачак, 1 урынга – сарык бүләккә.
• Биш фотозона, күбәләкләр паркы күргәзмәсе булачак, балаларга күбәләк бүләк итәчәкләр.
• Балалар ярминкәсе була, үзләре әйберләр алып килеп, башка балалар өчен үзләре сатачаклар.
• «Гали Баба» әкиятен сәхнәләштерү

Әлеге чара турында: «Бу бәйрәм күбрәк дини белем-тәрбия бирү түгел, нәкъ тә менә балалар өчен, алар Корбан гаете турында белсеннәр дип үткәрелә. Чөнки әти-әни иртәнге намаз, корбан чалулар белән мәшгуль була, балалар бәйрәмнең ни икәнен белми дә кала. Шуңа күрә кызыксынган теләсә кем килә ала монда», – дип аңлатты «Ал таң»мәчете имам-хатыйбының укыту-тәрбия эшләре буенча урынбасары Айгөл Махиянова.