КОЛЛЕДЖЛАРДА 100 ПРОФЕССИЯ ЮККА ЧЫГАЧАК?

2020нче елның 1нче сентябреннән Россия колледжларында 100гә якын профессия буенча белем бирү туктатылачак. Бу турыда Россиянең Мәгариф министры Ольга Васильева хәбәр итә.

Иң беренче чиратта, укыту программасыннан соңгы биш елда укучыларда кызыксыну уятмаган белгечлекләрне бетерәчәкләр. Андый профессияләр рәтендә – радиооператор, тегүче, эмаль савыт-сабалар ясаучы һәм башкалар бар.

Министр фикеренчә, бу белгечлекләрнең кайберләре эчтәлек ягыннан ярлыланган, кайберләренә, билгеле бер сәбәпләр аркасында, бүгенге көндә бөтенләй ихтыяҗ юк. Бу профессияләр урынына замана таләп иткән яңа белгечлекләр киләчәк. Яңа профессияләргә мехатроника һәм мобиль робототехника, аддитив технологияләр, график дизайн кебек белгечлекләр керә.