KazanOperaLab: опера лабораториясе ачык

7 декабрь көнне Казанда беренче тапкыр “KazanOperaLab” дип исемләнгән опера сәнгате лаборатория-мәктәбе ачылды. Проектның беренче этабы 23 декабрьгә кадәр дәвам итәчәк, шушы вакыт аралыгында музыка, театр сәнгате белгечләре тарафыннан лекция, мастер-класслар уздырылачак. 

KazanOperaLab – яшь композитор, драматург, режиссер, рәссамнар өчен иҗат итү һәм белем алу мохите, аларны тыгыз программа көтә. Спикерлар буларак Россия сәнгате өчен шактый эш башкарган опера режиссеры Василий Бархатов, композиторлар Александр Маноцков, Светлана Нестерова, Эльмир Низамов, драматурглар Евгений Казачков һәм Михаил Дурненков һәм башка шәхесләр чакырылган. Лабораториядә катнашучылар арасында Татарстан тамашачысы өчен таныш исемнәр дә байтак: композитор Ләйсән Абдуллина, драматурглар Сөмбел Гаффарова һәм Рүзәл Мөхәммәтшин һ.б.

Әлеге лаборатория үз эшен 2017 елның декабреннән 2018нең ноябренә кадәр дәвам итәр дип көтелә. Проект җитәкчесе Данияр Соколов әйтүенчә, киләсе елның ноябрендә проектның нәтиҗәсе буларак, премьера куелачак. Проектның барлыкка килүе турында ул: “Татарстанда заманча операны үстерү өчен эшли торган яңа буын музыкантлар тәрбияләргә кирәк, дигән нәтиҗәгә килдек”, - ди.

Зилә Сабитова