КАЗАНДА ТӨП ЧЫРШЫНЫ БИЗИ БАШЛАДЫЛАР. УЛ КАЙДА УРНАШКАН?

Чыршы кайчан “җыелып” бетәчәк? Ул кайда урнашкан? Бу һәм башка сорауларга җавап безнең язмада.

Казанда “Казан” гаилә үзәге янында чыршыны кора башладылар. Хәзерге вакытта әле аның иң аскы өлешләре генә җыелган.

Узган ел биредәге чыршы Татарстан башкаласындагы иң төп чыршы булган иде. Аның янында бозлы шәһәрчек та эшләде. Татарстан халкы, килгән кунаклар Яңа ел бәйрәмнәрен күбесенчә шушы тирәдә уздырды. Анда барлыгы 400 мең тирәсе кеше килгән.

Быел чыршыны якынча 20 декабрьдә корып бетерергә планлаштыралар. Бәйрәм программасы да әлегә әзерләнә генә. Бу турыда Казан мэриясенең матбугат хезмәте хәбәр итә.

– Чыршының җыелып бетү вакыты якынча 20нче декабрь булыр дип көтелә. Ә мәдәни күңел ачу программасы бүгенге көндә әзерлек стадиясендә. Калган яңалыкларны соңрак хәбәр итәчәкбез, - диелә хәбәрдә.