КАЗАНДА СТУДЕНТЛАР КОМАНДАЛАРЫ АРАСЫНДА ХОККЕЙ БУЕНЧА ТУРНИР УЗА

24-27 октябрьдә Казанда үзешчән студентлар командалары арасында Идел буе федераль округы кубогы өчен хоккей буенча турнир уза. Ярышларда катнашу өчен бу елны Казанга 14 команда килгән. Җиңүчегә 100 мең сум күләмендә акчалата бүләк тапшырачаклар.

Турнирда аспирантлар, профессиональ хоккей клублары белән контрактлары булмаучы, көндезге һәм читтән торып уку формаларында белем алучы студентлар катнаша.

27 октябрьдә «Зилант» боз аренасында ярышларның финалы, шулай ук ябылу тантанасы һәм җиңүчеләрне бүләкләү үтәчәк. Соңгы матч 13:30 сәгатьтә башлана.