10-11 СЫЙНЫФ УКУЧЫЛАРЫ ӨЧЕН МӘҖБҮРИ ФӘННӘР ИСЕМЛЕГЕ РАСЛАНДЫ

Россия Мәгариф министрлыгы яңа Федераль дәүләт белем бирү стандартын (ФГОС) бастырып чыгарды. Анда 10-11 сыйныфларда укучылар өйрәнергә тиешле фәннәр исемлеге дә күрсәтелгән. Яңа таләпләр 2027 елның 1 сентябреннән гамәлгә керәчәк.

Мәҗбүри фәннәр арасында:

• рус теле;
• әдәбият;
• туган тел яки Россия республикаларының берсенең дәүләт теле;
• туган әдәбият;
• чит тел;
• икенче чит тел;
• математика;
• информатика;
• тарих;
• җәмгыять белеме;
• география;
• физика;
• химия;
• биология;
• «Ватанны саклау һәм куркынычсызлык нигезләре»;
• физкультура.

Шул ук вакытта туган тел, туган әдәбият һәм икенче чит телне укучы яки аның әти-әнисе гаризасы буенча, шулай ук мәктәптә моның өчен тиешле шартлар булган очракта укырга мөмкин булачак.

Моннан тыш, 2027 елның 1 сентябреннән өлкән сыйныф укучылары кайбер фәннәрне кайсы дәрәҗәдә — база яки тирәнәйтелгән дәрәҗәдә — өйрәнүне үзләре сайлый алачак.

Яңа ФГОС нигезендә 10-11 сыйныфлардагы уку йөкләнеше дә артачак. Укуның минималь күләме хәзерге 2170 сәгатьтән 2312 сәгатькә кадәр җитәчәк.