КАЗАНДА МАВЫКТЫРГЫЧ ФӘННӘР АКАДЕМИЯСЕ АЧЫЛА

Казанда төрле фәннәргә багышланган дәресләр сериясе старт ала. «Мавыктыргыч фәннәр академиясе» программасын «Созвездие-Йолдызлык» арт-резиденциясе башлап җибәрә. Чараны астрономия буенча интерактив программа ачачак.

7-10 яшьлек балаларга Айның җиргә ничек тәэсир итүе, Кояш системасының нинди планеталардан торуы турында сөйләячәкләр. Программаның интерактив булуы балаларга планетадагы ел фасылын алыштыру, шулай ук җирнең атмосфера катламнарына әверелеп, үзләренә Ай Һәм Кояш образларын алу мөмкинлеген бирәчәк. Беренче чара уңышлы чыкса, мондый мавыктыргыч Фәннәр академиясе атна саен узачак. Чараларда балалар химия, физика һәм ботаника кебек башка фәннәр белән дә таныша алачак.