КАЗАНДА «КАЗАН» ГАИЛӘ ҮЗӘГЕ ЯНЫНДА 4 МЕҢ КВАДРАТ МЕТРЛЫ ЯСАЛМА БОЗ ШУГАЛАГЫ АЧЫЛАЧАК

Яңа ел бәйрәмнәренә Казандагы «Казан» гаилә үзәге янында ясалма суыту системасы булган зур шугалак ачарга планлаштыралар. Аның мәйданы якынча 4 мең квадрат метр тәшкил итәчәк, бер үк вакытта биредә 350гә кадәр кеше шуа алачак.

Бу хакта Казанның туризмны үстерү комитеты рәисе Александр Шавлиашвили хәбәр иткән. Шугалак һава торышына бәйле булмаячак, чөнки боз ясалма рәвештә суытылачак.

«Казан» гаилә үзәге янындагы мәйданны шәһәрнең төп Яңа ел локацияләренең берсенә әйләндерергә ниятлиләр. Монда шулай ук Казанның төп чыршысын урнаштыру һәм ярминкә оештыру күздә тотыла.

Яңа шугалак Казанның кышкы туристик стратегиясенең бер өлеше булачак. Ноябрьдә Россия буенча «Кышкы Казан» реклама кампаниясен башлап җибәрү дә планлаштырыла.