I "Күпмилләтле Казан көе" фестивале гөрләде

Кичә Салих Сәйдәшев исемендәге Зур концертлар залында I "Күпмилләтле Казан көе" фестивале гөрләде. Зур сәхнәдән күпмилләтле Татарстаныбыз башкаласында яшәүче 10-лап халык вәкилләре үз моңнарын сузды, аларга «Tatarica» оркестры ярдәм итеп торды.

Фестиваль кунакларын, катнашучыларын Фестивальне оештыруга ярдәмен керткән мөхтәрәм кунаклар да сәламләде.

— Милли көйләр тулысынча халыкның тормыш-көнкүрешен, күңелен сурәтләп бирергә сәләтле. Аларга әле халыкның милли уен кораллары да кушылса... Казаныбызда яшәүче милләтләр вәкилләренең узара дус-тату яшәве күңелле фал, - дип белдерде Казан шәһәренең Башкарма комитеты мәдәният идарәсе җитәкчесе Азат Абзалов.

I "Күпмилләтле Казан көе" фестиваленә 50-дән артык катнашырга теләк белдерүче гариза кабул ителгән. Татар, рус, якут, әрмән, украин, казах, еврей, башкорт, мари һәм кыргыз халыклары милли мирасларын зур сәхнәдән тәкъдим итә алдылар. Фестивальдә, чын мәгънәсендә, гаилә мохите хөкем сөрде.