ГАСТРОФЕСТ: ТӘМЛЕ АШАУ ҺӘМ КҮҢЕЛ АЧУ УРЫНЫ СИНЕ КӨТӘ!

Милли, җәйге һәм хәләл ризык, зәвыклы десертлар, фастфуд, мәдәни программа, күңел ачу – болар барысы да сине һәм синең дусларыңны бу шимбәдә көтә! 4 июньдә Казанның Аккош күлендә беренче тапкыр гастрономия фестивале уздырыла. Фестиваль җәйге сезонны ачып җибәрәчәк. Оештыручылар үзең белән плед һәм күтәренке кәефне онытмаска киңәш итә.

Иртәнге сәгать 10:00дан кичке 20:00га кадәр фестиваль кунаклары рәхәтләнеп ял итә алачак. Аккош күле мәйданчыгында килүчеләр өчен махсус берничә локация әзерләнәчәк, шуларның иң олысы – фудкорт зонасы.  Шулай ук Аккош күлендә фонтанлы су тамашасы һәм виндсерфинг белән электро-фойл буенча республика осталарыннан төрле трюклар күрсәтеләчәк. Иң кыю кунаклар өйрәтү локацияләренә барып, аннан шушы су транспортларында үзләрен сынап карарга мөмкин. Әле моның белән дә бетми: фестивальгә килүчеләр командалар ясап, комда волейбол да уйный алачак.

Биредә хәтта ярминкә дә гадәти түгел. Фестиваль ярминкәсендә үзенчәлекле әйберләр, интерьер кирәк-яраклары сатып алырга мөмкин. Ә палатка һәм кемпингта ял итәргә яратучыларны учак янында гитара белән җырлау атмосферасы көтә. Анда туристик бизнес операторлары походлар һәм экскурсияләр өчен иң матур һәм кызыклы урыннар турында сөйләячәк. Ә иң кечкенә кунаклар өчен диджей һәм аниматорлы махсус балалар кемпингы эшләячәк.

Болардан тыш, фестивальнең мәдәни программасы үз эченә Казанның төрле коллективларының чыгышларын да алган. Җырлы, биюле атмосфера сиңа онытылмас хис-кичерешләр бүләк итәчәк. Уңайлы булсын өчен, шәһәр халкы фестивальгә махсус автобуслар белән барырга мөмкин.