Гади укытучылар... калмаячак

Мәктәп укучыларына бөтен укытучылар да бер дәрәҗәдә тоелса да, алар үзара төрле дәрәҗәгә бүленә. Мөгаллимнәрне, тәҗрибәсе, эшләгән эше, нәтиҗәләренә карап, икенче, беренче, югары квалификация категорияле укытучыларга аералар. Тик болар исә укучыларның үзара аралушында исәпкә алынмый. Хәзер исә тагын бер яңалык пәйда була.

Тиздән мәктәпләрдә “өлкән укытучы”, “әйдәп баручы укытучы” дип аталган яңа вазифалар кертеләчәк. Россия Мәгариф министрлыгы моның турында карар чыгарган. Аның документы нигезендә “өлкән укытучы” вазифаларына педагогик хезмәткәрләрнең гомуми белем бирү программалары компонентларын эшләүдә катнашуын проектлау һәм координацияләү, укытучылар эшчәнлеген методик яктан тәэмин итү керә. Ә “әйдәп баручы укытучы” вазифаларына укытучылар, психологлар, дефектологлар, социаль педагогларны эшкә интеграцияләү, педагогик остазлык керәчәк.