АВЫЛГА КАЙТКАН УКЫТУЧЫЛАРГА 1 МИЛЛИОН СУМ

Татарстан хөкүмәте шул турыдагы карарга кул куйган. Аның буенча авылга эшкә кайткан укытучыларны 1 миллион сум күләмендә акча белән “бүләкләячәкләр”. 

Әйтергә кирәк, биредә сүз кечкенә авыллар турында гына бармый. Шәһәр тибындагы бистәләр һәм 50 меңнән азрак кеше яшәгән шәһәрләрне сайлаган мөгаллимнәр дә 1 миллион сумга өметләнә ала. 

“Авылга, шәһәр тибындагы бистәләргә һәм 50 меңнән азрак кеше яшәгән шәһәрләргә эшкә кайткан укытучыларга бер тапкыр 1 миллион сум күләмендә компенсация түләргә”, - диелгән Татарстан премьер-министры Алексей Песошин имзалаган документта. 

Әлеге түләүләр өчен Татарстанның мәгариф һәм фән министрлыгы җаваплы булачак. Акча Татарстан бюджетыннан бүленәчәк.