Авыл укытучысына – 1 миллион сум?

2020 елдан Россия төбәкләрендә «Земский учитель» проекты башланып китәчәк. Хәзерге вакытта аның документлары әзерләнелә.

Быел Россия Президенты Владимир Путин Федераль җыенга юлламада «Земский учитель» проекты башлануы турында хәбәр итте. Әлеге программа буенча кечкенә шәһәрләргә һәм авылларга укытырга кайтачак укытучыларга берьюлы 1 миллион сум күләмендә акча биреләчәк.

Россиянең Мәгариф министры урынбасары Татьяна Синюгина әйтүенчә, проект 2020 елның 1 гыйнварыннан тормышка ашырыла башлаячак. Хәзерге вакытта шушы проект турында фикер алышулар бара. «Земский учитель» проектын тормышка ашырганда, төбәкләрдәге тәҗрибә дә кулланылачак.

Алинә МИННЕВӘЛИЕВА әзерләде

Илназ Мөхәрләмов фотосы