"5"ле, "4"ле билгеләре бетә?!

Россия мәгариф һәм фән өлкәсендә күзәтчелек хезмәте мәктәпләрдә биш баллы системаны бетерү мөмкинлеген карый. 

“Биш баллы система күптәнге. Әлбәттә, аны үзгәртергә кирәк”, - дип саный Югары икътисад мәктәбе илкүләм тикшеренү университеты Белем бирү сыйфатын күзәтү үзәге җитәкчесе Болотов. Аның сүзләренчә, күп баллы системага күчү мөмкинлеге бар иде, шулай ук 12 баллы система буенча зур проект та бар иде.

Болотов сүзләренчә, хәзер мәктәпләрдә 4 баллы система, чөнки “бер"ле билгесен куймыйлар диярлек. Әмма “3+” яки “4+” кебек билгеләр актив кулланыла.

Хәбәрдә әйтелгәнчә, бөтенроссия сыйфатны бәяләү системасын булдыру эшләре беренче ел гына бармый. Әмма укытучы бәяләү буенча заманча ысулларны белми. Мәгариф системасына мондый глобаль үзгәрешләр кертү  өчен, укытучының квалификациясен күтәрү зарур, диде Виктор Болотов.

tatar-inform.tatar