21 ЯШЬКӘ КАДӘР ФАСТФУД САТУНЫ ТЫЮ ТӘКЪДИМ ИТЕЛӘ

Россиядә яшьләр өчен фастфуд продукциясен алу турында яңа тәкъдим яңгырады. Заманча сәясәт проблемаларын өйрәнү институты директоры Антон Орлов югары уку йортлары янында гамбургер, хот-дог һәм башка шундый тиз әзерләнә торган ризыклар сатуны тыю, шулай ук аларны сатып алу өчен минималь яшьне 21 яшькә кадәр күтәрү тәкъдиме белән чыкты.

Идея авторы фикеренчә, нәкъ менә студентлар куркыныч янау төркеменә керә. Яшьләре һәм психологик үзенчәлекләре аркасында алар еш кына үзләренең туклану гадәтләренең озак вакытлы нәтиҗәләре турында уйлап бетерми, ди ул. Политолог сүзләренчә, дәүләт алкоголь һәм тәмәке продукциясенә карата сәясәтне катгыйландырган кебек, сәламәтлеккә зыян китерә торган ризыкларга карата да шундый ук алым кулланырга тиеш.

«Яшьләр – бик эмоциональ төркем. Алар ризык сайлаганда еш кына баш белән уйлап бетерми», – дип белдергән Антон Орлов. Аның фикеренчә, университетлар янында урнашкан тиз туклану нокталары студентларны җиңел клиент буларак күрә.

Фастфудка керүне чикләү тәкъдиме ил халкының сәламәтлеген саклау өчен профилактик чара буларак карала.