ЯШЬ ПЕШЕКЧЕЛӘРНЕ "ТАТАР ГАИЛӘ"СЕ КӨТӘ

Кызлар колагына! Әмма малайларга да ярап куяр. Тиздән 8 Март – Халкыра хатын-кызлар көне якынлаша. Димәк, яраткан әни, әбиләребезгә бүләк әзерләр чак җиткән. Иң яхшы бүләк, әлбәттә, үз күңелеңнең җылысын биреп ясаган ризык. Ә аны 22 февраль көнне Казанның бер ресторанында әзерләргә өйрәнергә мөмкин.

Бу көнне танылган аш-су остасы Юныс Әхмәтҗановның юбилее уңаеннан, яшь пешекчеләр һәм аш-су осталары арасында “Татар гаиләсе” дигән бәйге үткәрә.

Конкурста яшь пешекчеләр һәм аш-су осталары, Казанның вузлары һәм көллиятләрендә укучылар, шулай ук Татарстанның башка шәһәрләре һәм районнарыннан вәкилләр, чит төбәкләрдән аш-су өлкәсендә эшләүчеләр катнашачак. Аларга карап, син дә шеф-поварлар кебек ризык әзерләргә өйрәнә аласың!

Яшьләр ярышларда көч сынашып, бәйгедә катнашып үзләренең иҗади осталыкларын күрсәтә алачаклар. Җиңүчеләргә мактау кәгазьләре, бүләкләр тапшырылачак. 8 Мартка үзе тәмле, үзе менә дигән бүләк әзерлим, дисәң, конкурска кил!

Вакыты: 22 февраль (чәршәмбе), 09.00-14.00
Урыны: Казан, Шмидта ур. 34/18, «Тәмле булсын» рестораны