«НӘҮРҮЗ» БАШЛАНДЫ!

Тукта, тукта, җәй көне нинди Нәүрүз инде ул дисеңме? Җәен дә бар ул «Нәүрүз»! Татарстанда шундый исемне йөрткән Халыкара театр фестивале уза. Каникуллар – мәдәни чараларга йөрер өчен менә дигән вакыт! Җәйге ялда мондый шансны кулыңнан ычкындырма!

Кичә, 5 июнь көнне, Г. Камал татар дәүләт академия театры кашындагы мәйданда фестиваль тантаналы рәвештә ачылды. Белгәнебезчә, 2015 елдан алып «Нәүрүз» төрки халыкларның театр мәдәниятенә багышлана. Быел фестиваль Якутия театры эгидасы астында уза.

Кич белән Камал театрында Саха республикасының (Якутия) «Воительница - Джырыбына» спектакле тәкъдим ителде. Аны Олонхо театры режиссеры матрена Корнилова сәхнәләштергән. Әлеге спектакль сугышчы кыз турында иде.

Фестиваль 9 июньгә кадәр дәвам итәчәк. Аның программасында Хакасия, Кабардино-Балкария, Башкортостан, Чуашстан, Тува, Алтай республикалары театрларыннан кала, Казахстан, Эстония театрларының спектакльләре дә бар.