ОКТЯБРЬ 2023

Журналның октябрь саны тышлыгында сине чибәр Мәрьям сәламли. Аның белән «Лучше всех» проекты һәм нәфис гимнастика турында сөйләштек. Мәрьямнең тышлыктагы образына игътибар белән кара әле, бу милли колоритлы образ ни турында сөйли, дип уйлыйсың? Бу образ «Бик матур» проектының икенче сезоны башлануын күрсәтә! Бу сезонда да без стилист ярдәме белән җыелган зәвыклы, этник элементлы образларны журналда биреп барачакбыз.

Шулай ук, «Шәхес» сәхифәсендә сине җырчы «Дышать» белән әңгәмә һәм «Ялкын»да эшләүчеләрнең әтиләре турында истәлекләре көтә.

Ә «Ачыш» сәхифәсе өчен без бер-берсенә ике тамчыдай охшаган игезәкләрдән интервью алдык һәм алар белән булган кызыклы хәлләр турында сораштык.

Шушы ук сәхифәдә сине кадакта торуның уңай һәм тискәре яклары, җир тетрәүләрнең ни рәвешле барлыкка килүе һәм «Әйдә Шаярт»ның бу сезон җиңүчеләре «Нәмәкәй» командасы турында язмалар көтә.

Ә «Тәҗрибә» сәхифәсендә мәктәптә кызыклы бәйрәмнәр уздыру серләре, интернатта яшәп уку үзенчәлекләре турында язмалар урын алды. Шушы ук сәхифәдә психолог белән «третий лишний» күренеше турында сөйләштек.

«Иҗат» сәхифәсендә тәүге гашыйклык турында комикс, «Ядәч» фильмыннан хис-кичерешләр һәм «Ал җилкәннәр» спектакле турында язмалар бар. Һәм, әлбәттә, сканворд, анысы – на десерт!