КЫШКЫ ИРТӘ

Кышкы иртә

Кышкы иртә балаларны

Йокысыннан уята.

Таң белән малайлар-кызлар

Кыш бабай ясап ята.

 

Яңа кардан бүрек әзер,

Уңган да безнең Барый.

Кызыл борынлы бабайга

Баздагы кишер ярый!

 

Әйдәле, Сөмбел бизәсен

Аның сакаллы битен.

Аякларына кидерик

Йомшак, яңа итеген!

 

Ак туны әзер бабайның,

Таман, килешеп тора.

Уң кулына Раяз әнә

Шәп таягын тоттыра!

 

Бүләк-күчтәнәчләр тулы

Саллы зур капчыгы бар.

Җылы бияләй кидерик,

Өшемәс, юлы уңар!

 

Эз тулы капка төпләре

Күр, үзенә чакыра.

Хәтта әнә тәрәзәләр

Елмаеп  карап тора.

 

Сабый җанлы икәнлеген

Бөтен кеше дә белә.

Кыш бабай шуңа беренче

Балалы йортка килә!

 

Кышкы иртә балаларны

Йокысыннан уята.

Малайлар-кызлар авылда

Кыш бабай ясап ята!..

18.12.2020

Таһир Шәмсуаров 

Иң мөһим һәм кызыклы язмаларны Татмедиа Telegram-каналында укыгыз


Нравится
Комментарии (0)
Осталось символов:
Шәп укыла
Иҗат
«УНБЕРЕНЧЕ ӘХМӘТ» ӘКИЯТЕ
529
0
1
Иҗат
ДИЮ КЫЗЫ, БАЙ МАЛАЕ ҺӘМ МУЛЛА
594
0
0
Иҗат
МОҢЛЫ ЧИШМӘ КАЙТАВАЗЫ
907
0
0