ӘЙДӘМАН БУЛЫЙМ ДИСӘҢ...

Чәчәкләр тотып кулга, без чыктык матур юлга. Һәркем белә, әлбәттә: без барабыз... Әйе, әйе, мәктәпкә! Урамда инде күптәннән 1 сентябрь түгел бит дисезме? Килешәм, әмма бу мәктәп гади белем йортларыннан аерылып тора, укучылары да 7 яшьлек балалар түгел, ә студентлар! Сер капчыгын чишик: 18 октябрьдә "Сәләт", ниһаять, үз-үзләрен үстерү, актив тормыш алып бару һәм киләсе җәйләрен күңелле уздыру теләге белән янучы студентларга үз ишекләрен ачты. Көзнең иң көтеп алынган чараларының берсе – “Әйдаманнар мәктәбе” старт алды.

Кичнең салкын булуы, өстән яңгыр сибәләвенә карамастан, студентлар Островский урамына таба агыла. Укудан соңгы хәлсезлек, кайткач өй эшләре эшлисе бар бит дигән күңелсез уйлар "Сәләт" йортына якынлашкан саен эреп юкка чыга бара. Чыннан да, тиздән "Сәләт" дөньясына чуму, әйдаман булу серләренә төшенә алу бәхетенә өй эшләренең күп булуы гына комачау итә аламы соң? Әлбәттә, юк! Беренче дәрескә килгән студентлар шул фикердә кебек тоелды, чөнки һәрберсенең йөзендә елмаю балкый иде.

Әйткәнемчә, "Сәләт" йортына бу кичне яшьләр күп җыелган иде. Укуларны оештыручылар хәстәрен алдан күргәннәр: белем алырга килүчеләрне ике төркемгә бүлеп укыттылар. Һәр ике аудиториядә "Сәләт" белән таныштыру, әйдаман эшенең асылын аңлату башланды. Дәресләрнең берсен Альбина Кадыйрова алып барды. “Укучылар”ны сәламләгәч, Альбина апа дәресләр тәртибен, аларның кайда һәм ничек узачагы турында сөйләде. Булачак әйдаманнар һәр атнаның чәршәмбе көнендә "Сәләт" йортында күрешергә сүз куешты.

Ә укуы ул вакытка тәмамланмаса яки башка сәбәп килеп чыгып әйдаманнар мәктәбенә килә алмаса, студентка нишләргә? Быел "Сәләт" комитеты бу мәсьәләне чишү юлын тапкан. Дәрескә килә алмаучыларга лекцияне Интернет аша тыңлау һәм карау мөмкинлеге тудырылган. Әмма бер “ләкин” бар: дистанцион рәвештә генә үтелгән дәрестән соң, әйдаман тест үтәргә тиеш булачак. Шулай итеп “укучы”ның лекцияне игътибар белән тыңлавы-тыңламавы ачыкланачак, ди оештыручылар.

Аеруча зур игътибар бирелгән мәсьәләләрнең берсе быел татар теле булган. Әйдаманга татар телен белү – мәҗбүри. Бу хакта булачак әйдаманнарны уку елы башлану белән котларга килгән Җәүдәт абый Сөләйманов та сөйләде.

“Төрекчә “i” хәрефе ноктасыз булмый, ә "Сәләт"тә ул нокта – татар теле. Аны белмисез икән, әйдаманнар мәктәбенә бөтенләй йөрмәгез. Әгәр татар телен белмичә, инглиз, француз яки башка телләрне беләсез икән, "Сәләт"тә сезне кулда гына күтәреп йөртәчәкләр. Сез төрле проекталарда катнаша, татар телен үстерүгә һәм баетуга үз өлешегезне кертә алачаксыз. Бу мөһиттә туган телне өйрәнү мөмкинлеге дә бар, әмма ана телен хәзердән үк белмәүчеләргә әйдаманлыкка юл ябык”, – дип белдерде "Сәләт"нең “әтисе”.

Шунысы куанычлы: дәрескә килүчеләр арасында татар телен белмәүчеләр юк иде. Җәүдәт абыйның “Арагызда татар телен аңламаучылар бармы?” дигән соравы яңгырагач, аудиториядә тынлык урнашты. Димәк, бирегә килгән студентларның әйдаман мәктәбен уңышлы үтә алуларына өмет зур.

Сүз уңаеннан, ел саен кабатланып килүче традиция быел да сакланган: аудиториядә утыручыларның күп өлешен кызлар тәшкил итә иде. Әмма, сәлкешләр, аланда “абый” дип эндәшерлек кеше булмаячак икән, дигән борчуга кала күрмәгез, дәрес тыңлаучылар арасында егетләр дә бар иде. Килүчеләрнең күбесе "Сәләт" аланнарында сәлкеш булганнар, форумга кунак булып барганнар. Араларында "Сәләт" белән беренче кат танышучылар, аның мөһитенә беренче кат аяк басучы берничә студент та бар. Алар әле үзләре өчен яңа дөнья – "Сәләт" дөньясын ачачак кына.

Белем алу – энә белән кое казуга тиң, ди татар халкы. Булачак әйдаманнарның энәләре үткен булсын дигән теләктә калыйк. Хәерле сәгатьтә!

Раилә Вәлиуллина

Иң мөһим һәм кызыклы язмаларны Татмедиа Telegram-каналында укыгыз


Нравится
Комментарии (0)
Осталось символов:
Шәп укыла
  • 30 август 2020 - 17:15
    ҮЛЕМНӘН КӨЧЛЕРӘК – Ну-ну-ну! Марш, агай, үз урыныңа! Үз тавышын үзе танымады кыз. Тик тегенең тамчы да исе китмәде, атлап барган шәпкә ике кулын сузып, күрешергә килгән кыяфәт чыгарды. Тагын ике секундтан ул аны шул пычрак куллары белән эләктереп үк алачак... – Үзең китәсеңме, әллә булышыргамы сиңа, абзый кеше? Зөмәрә аңышмый калды: кайчан, каян килеп чыкты бу зифа буйлы егет, ни ара аларның уртасына кереп басты? Сәрхуш ирнең йөзе әче әйбер капкандай җыерылып килде; селтәнергә дип күтәргән кулы белән башын кашып алды да, ава-түнә үз почмагына таба китте.
    2491
    0
    15
  • 20 август 2020 - 16:57
    ЯЗМЫШЛАРНЫ САЙЛАП АЛМЫЙЛАР Энҗе, әнисе күрмиме икән, дип, курка-өркә өйләре ягына карап торды да, тиз генә мунчага кереп китте. Пычранган күлмәген мунча алдында салды да, эчкә кереп, салкынча суда нәни куллары белән ышкып-ышкып юарга тотынды. Эскәмиядә яткан хуш исле кул сабынын тидерде. Итәк очындагы таплар бетмәгәч, кырыйда торган кер тактасына салып тырышып-тырышып ышкырга кереште. Урам аша гына яшәгән күрше әби оялтты аны бүген.
    2325
    0
    13
  • 22 август 2020 - 09:00
    НУРЛАНЫШ БҮЛМӘСЕНДӘ ...Май кояшы җылы нурларын өләшә. Палатаның кечкенә тәрәзәсеннән төшкән саран нурлар Регинаның күзләренә төшеп күзләрен камаштыра, күзләре үзләреннән-үзләре яшьләнеп йомылалар. Яшьләнгән күзләрендәге җан сагышын башкаларга күрсәтмәскә тырышып, стенага борылып ятып, одеялын башыннан үк бөркәнеп куя да уйлар диңгезенә чума яшь ана.
    1972
    0
    8

Блоглар
  • МУСА ҖӘЛИЛ ИСЕМЕНДӘГЕ КӨРӘШ ЯРЫШЛАРЫ-2020 (ФОТОРЕПОРТАЖ)
  • CLUBTURBO WINTER DRIFT CUP ИКЕНЧЕ ЭТАП: ФОТОРЕПОРТАЖ
  • «ӘЙДӘ, ШАЯРТ»: ФИНАЛ
  • ТАТАР ИҖАДИ КОМАНДАЛАРЫ АРАСЫНДА МИНИ-ФУТБОЛ
  • РУБИН–ДИНАМО 0:1 (ФОТОРЕПОРТАЖ)
  • TAT CULT FEST 2019
  • ПИТРАУ-2019: КАРЕНДӘШЛӘР, АРУМЫ СЕЗ?
  • ПЕЧӘН БАЗАРЫ – 2019