"ЯЛКЫН" ҺӘМ "САБАНТУЙ"НЫҢ ДУСЛАРЫ КҮБӘЯ!

«Ялкын» һәм «Сабантуй» журналлары редакциясе хәзерге вакытта нәрсә белән шөгыльләнә? Әлбәттә, үзенең кадерле укучылары өчен кызыклы язмалар әзерли. Ә «Ялкын» дуслары нәрсә эшли? Яраткан журналларына дусларын, туганнарын һәм яхшы кешеләрне яздыра. Чын әйтәбез. Мәсәлән, шимбә көнне «Ялкын» һәм «Сабантуй» журналларының дуслары бик күп балалар йортларын, балалар белән эшләүче үзәкләргә подписка бүләк иттеләр.

Татарстан Республикасының Премьер-министры Алексей Валерий улы Песошин, мәсәлән, Кукмара районының «Милосердие» реабилитация үзәгенә 5 «Ялкын» һәм 5 «Сабантуй» журналын яздырды.

Республикабызның Мәдәният министры Айрат Миннемула улы Сибагатуллин да читтә калмады. Ул Минзәлә муниципаль районында эшләп килә торган «Умырзая» реабилитация үзәгенә журналлар бүләк итте.

Татарстан Республикасының Пенсия фонды бүлеге җитәкчесе Вафин Эдуард Яфасович, Татарстан таможня хезмәте җитәкчесе Альберт Вазил улы Мавликов Түбән Кама балалар йортына һәм Минзәлә районының «Тургай» приютын журналларга яздырды.

Республикабызның Транспорт һәм юл хезмәте министры Ленар Ринат улы Сафин «Родник» комплекслы үзәгенә берьюлы 5 «Сабантуй» журналын бүләк итте.

Бер көн эчендә никадәр изгелек. Ярты ел дәвамында «Ялкын»лы һәм «Сабантуй»лы язмалар никадәр кешене куандырып торачак. Димәк, без тагын да канатланып эшлиячәкбез.

#ПодариПодписку