БЕРДЫЕВНЫҢ СОҢГЫ МАТЧЫ? КАЗАНДА – ӘЙЕ! (ФОТОРЕПОРТАЖ)

“Рубин” аутсайдер команда капкасына гол кертә алмады: 20 май кичендә “Казан Арена” стадионында “Анжи” белән уен тигез исәпкә төгәлләнде – 0:0. Бу “Рубин”ның сезонда Казандагы соңгы матчы булды.

Түбә булмау куркыта


45 мең кеше сыйдырылышлы стадион бу юлы да тамашачы җыя алмады – уенны карарга килгән 5405 кешене бергә тупласаң да, аренаның почмагы гына тулыр иде, мөгаен. Кызганыч, бу “Рубин”, гомумән Казан футболы өчен проблемага әйләнеп бара. Төп сәбәпләрнең берсе – җиңүләрсез һәм матур булмаган футбол. Әмма җитәкчелек сер бирергә теләми.

– Бәлки сәбәпләрнең берсе – салкыннардыр. Төбәктә салкынчарак һава торышы бит, – дип сөйләде шушы көннәрдә “Рубин” клубының генераль директоры Рөстәм Сәйманов мәгълүм спорт каналының “Инсайдеры” тапшыруында “Казан Арена”га тамашачының аз йөрүе турында. – Хыялыбыз бар – стадионны түбәле итү. Моның өчен мөмкинлекләр бар. Республика җитәкчелегенә тәкъдим иттем, кызыксынып тыңладылар.

Стадион түбәле булырмы, анысын вакыт күрсәтер. Әмма “Рубин” яңа сезонны әлеге стадионда башлый алмаячак. Якын көннәрдә “Казан Арена”ны World Skills дөнья чемпионаты ачылышы һәм ябылышына әзерли башлаячаклар. Димәк, Үзәк стадионга әйләнеп кайтачакбыз. Хәер, 5 мең тамашачы өчен “Рубин”ның үз базасындагы стадион да җитәдер бәлки.


“Рәхмәт Бердыев!”


Стадионда халык аз булгач, шундый эчтәлектә язу тоткан ханым ерактан ук шәйләнде. Кырдагы уеннан бигрәк, баш тренер Корбан Бердыев тирәсендәге имеш-мимешләр кызыграк иде шул бу көнне. Футболдан ерак булмаганнар яхшы аңлый: Корбан Бердыев өчен бу Казандагы соңгы уен булырга мөмкин. Ул “Рубин”нан китәргә җыена. Бу хакта рәсми хәбәр 26 майда кичке сәгать 4ләр тирәсендә үк булырга мөмкин. Нәкъ менә шул вакытта сезонның соңгы туры кысаларында “Краснодар”-“Рубин” матчы төгәлләнәчәк. Корбан Бердыев нинди карар кабул итүе хакында ул чемпионатның соңгы турыннан соң җикерәчәкмен, диде бит.

– Безне Казанга югары максатларны чынга ашырырга чакырдылар. Шуңа туры китереп уенчылар чакырылды. Ул вакытта клубның проблемалары юк иде. Безнең клуб белән бер еллык килешү бар, хезмәт хакының югары булуын да аңлыйбыз, азрак алырга да әзербез. Бу яктан проблема юк. Аз акча белән дә уңышка ирешеп була. Әмма бердәм коллектив кирәк. Кызганыч, клубта анысын яхшыртырга кирәк. Максималь максатлар куелмаса, монда калуның мәгънәсен күрмим, – диде Бердыев әлеге уен алдыннан.

Китеп өлгермәсә дә, кандидатлар инде берничә – Роман Шаронов, Владимир Федотов һәм Роберт Евдокимов исемнәре атала.


Нәтиҗә юк. Бердыевны – җыелмага?


“Рубин” узган сезондагы кебек чемпионатны 10нчы урында төгәлли. Быел әле бер баскыч түбәнрәк тәгәрәү ихтималы да юк түгел. Ни кызганыч: нәтиҗә юк. Кичәге уен шуның бер дәлиле. Казан футболчыларының “Анжи”ны 2017 елның августыннан бирле отканы юк икән инде. Ә “Анжи” соңгы елларда түбән баскычлардан күтәрелә алмый.

– “Анжи” яхшы сакланды. Бер гол кертсәк, уен башка юнәлеш алыр иде, – диде кичәге уеннан соң Корбан Бердыев. Каләм әһелләре арасында аны Россия футбол җыелмасына кодалаучылар да табылды.

– “Рубин”нан китеп Россия җыелмасын җитәкләү ихтималымы? Элек тәкъдим булуы хакында әйткәнем булды, ризалаштым, әмма Черчесовны сайладылар. Һәм ул бу периодта яхшы нәтиҗә күрсәтте, – диде Бердыев.

Корбан Бердыев кая китәрме? Югары максат куйган һәм Чемпионнар лигасында уйнаган чит ил клубларында эшләү теләге дә бар, диде ул “Инсайдеры” тапшыруы вакытында.

Сүз уңаеннан, Чемпионнар лигасының яңа сезонында Россия клубларыннан өч команда – “Зенит”, “Локомотив” һәм “Краснодар” чыгыш ясаячак. Соңгы 7 елда беренче тапкыр ЦСКА чемпионнар лигасыннан мәхрүм калды.


Кемнәр калыр?


Ничек кенә булса да, яңа сезонда “Рубин”ның составы нык үзгәргән булачак. Дмитрий Полоз, Хорен Байрамян һәм Егор Бабурин  кебек уенчыларның аренда вакыты чыга. Хәтта үзебезнең егетләр дә китеп барырга мөмкин. Шуларның берсе – Егор Сорокин. Сүз уңаеннан, “Рубин” аны “Локомотив”ка сатарга мөмкин икән. “Тәкъдимнән тора. Без аны җибәрергә әзер”, – дигән Рөстәм Сәйманов.

Ә ул арада Егор Россия җыелмасының киңәйтелгән исемлегенә кертелде. Станислав Черчесов шәкертләре 2020 елгы Европа чемпионатына сайлап алу турнирында Сан-Марино (8 июнь) һәм Кипр (11 июнь) командалары белән уенга әзерләнә. Чемпионат киләсе елга 12 июнь – 12 июльдә 12 шәһәрдә, шул исәптән Санкт-Петербургта да уза. Билет бәясе дә билгеле: 30 евро –2100 сумнан башлана.

Хәер, монысы бөтенләй башка тарих булачак. Безне әлегә Бердыев һәм “Рубин”ның киләчәге ныграк кызыксындыра. Якшәмбене көтәбез...



















































Фәрит Салихов


Илназ Мөхәрләмов фотолары

Нравится
Комментарии (0)
Осталось символов:
Шәп укыла
  • 6 сентябрь 2019 - 14:06
    ӘТИ ЙОРТЫ Гөлсинурга авылда атасыннан мирас булып калган йортлары турында әнисе Сәвия бүген тагын шалтыратты: - Кызым, син кайчан барып рәтләп киләсең инде андагы эшләрне? Эчендәге әйберләрен җыеп түгәргә дә, сатарга кирәк инде өйне. Күпме торыр ул? Болай хуҗасыз килеш торса, тиз черер. Урыны да әйбәт йортның. Авыл уртасында. Хакларның әле әйбәт чагы. Акчасы артык булмас, кирәк җире табылыр.
    4756
    2
    92
  • 8 сентябрь 2019 - 10:29
    ИСКЕ ЙОРТ Яңа йорт салып, анда күченгәнгә тугыз ел үтсә дә, Гайшә карчык түбәләре тишелгән, ишеге кыйшайган, күбесенчә келәт вазифасын үтәгән иске өйне сүтәргә улы Рәискә моңа хәтле һич кенә дә ризалык бирергә теләмәде. Рәис, иске йортны сүтик, дип ничә кат сүз башламасын, Гайшә әби улының игътибарын башка якка бора торды, я аңа бик тә мөһим бүтән эш табып биргәләде.
    2805
    1
    78
  • 5 сентябрь 2019 - 10:08
    ӘНИ, СУ БИР! Зур хастаханәнең реанимация бүлеге янында күн эскәмиягә сеңеп диярлек утырган, ябык гәүдәле, башына ак яулык бәйләгән, моңсу-җитди кыяфәтле карчык яныннан табиблар, шәфкать туташлары тыз-быз үтеп йөри. Инде икенче атна моннан китми диярлек утырган әби аларның барысын да өмет тулы карашы белән каршы ала һәм сагыш белән озатып кала. Шәфкать туташлары... Нинди мәгънәле бу исем! Шәфкатьле!.. Менә берәрсе янына килер дә, әйтер кебек: ”Әбекәй, кызыгыз терелде. Бүген аны өйгә алып кайтып китәрсез”, - дияр кебек.
    2407
    0
    58
  • 24 август 2019 - 18:02
    ӘНИЗӘР (ХИКӘЯ) Алар газета-журнал нәшриятында очраштылар. Әнизәр, бер кочак кәгазь күтәреп лифттан чыгып килгәндә, колагына телефонын “ябыштырган” берәү белән бәрелеште.
    1840
    0
    20
  • 2 сентябрь 2019 - 14:57
    СУКЫР ЯЗМЫШ Электричкада кеше күп түгел. Көпә-көндез ник бушка куалардыр бу кадәр тимер өемен?! Әллә шул кеше юклыккамы – тавыш-тынсыз гына, шыңшып кына йөри ул бүген.
    1545
    0
    18

  • 27 август 2019 - 11:02
    РОССИЯДӘ ШӘП ФИЛЬМ ТӨШЕРӘ БЕЛӘЛӘР! 27нче август – Россия кинематографиясе көне. Россиядә, Совет чорында төшерелгән фильмнарга карата шикләнеп караучылар шактый, әмма син андыйлардан булсаң, бу язманы ябып куярга ашыкма, чөнки Россия кинематографиясе “Ёлки”, “Притяжение”, “Бабушка лёгкого поведения” ише чүп-чардан гына тормый. Һәм без сиңа блогер Badcomedian фикеренчә иң яхшы 5 рус телле фильм тәкъдим итәбез!
    102
    0
    2
  • 15 август 2019 - 09:28
    142 ЕЛ РӘТТӘН ЯҢГЫРЫЙ ТОРГАН СҮЗ! Нәкъ 142 ел элек, 1877 елның 15 августында Томас Эдисон телефоннан сөйләшкәндә «Hello» («Алло») сүзен кулланырга тәкъдим итә.

    1876 елда Филадельфияның бөтендөнья күргәзмәсендә Александр Белл исемле...
    102
    0
    0
  • TAT CULT FEST 2019
  • ПИТРАУ-2019: КАРЕНДӘШЛӘР, АРУМЫ СЕЗ?
  • ПЕЧӘН БАЗАРЫ – 2019