ЮЛ ЧАТЫ

Менә замана могҗизасы интернет дигәннәре авыл җиренә дә килеп җитте! Гөлфия анда бик озаклап утырырга мөмкинчелек тапмаса да, ара-тирә вакыт табып, бөтендөнья челтәренә кергәли башлады. Социаль челтәрләрнең берсендә үз сәхифәсен ачкан Гөлфия анда бергә укыган сыйныфташларын, ничә еллар буе күрмәгән дус-танышларын тапты. Кара әле, әллә кайдагы, бер-берсеннән еракта яшәгән танышларны, туганнарны кул сузарлык кына арага якынайта бит бу галәмәт, дип исе китте аның. Күп кенә дус-ишләре, аның сәхифәсенә кереп, үзләрен таныттылар. Күбесен Гөлфия исем-шәрифәләре буенча үзе эзләп тапты. Бик якын дуслары белән күрешеп очрашу бәхетенә дә ирештеләр алар.

Авыл җирендә кечкәй генә булса да үзенең тегү буенча бизнесен алып барган Гөлфиянең вакыты чикле булса да, ул яңа табышкан дус-иптәшләре белән аралашыр өчен интернет челтәренә кергәләп йөрде. Беркөн, үз сәхифәсенә кергән кунакларны карап утырганда, бик тә якын, таныш йөзне күреп, Гөлфияне яшен суккандай булды! Шушы кул сузарлык арадан гына аңа беренче яшьлек мәхәббәте серле елмаеп карап тора иде! Илдус... Яшьлек таңында сөеп-сөелеп тә кавыша алмый калган Илдус... Монитордан күзләренә мөлаем елмаеп караган Илдуска текәлеп, Гөлфия уйга калды...

Туган авылыннан ерак булмаган күрше авылга туганнарына кунакка баргач танышты Гөлфия Илдус белән. Кер тимәгән саф сөю белән сөйде ул аны. Илдус мотоциклына утырып еш килеп йөрсә дә, ул килә алмаган көннәрдә Гөлфия ярты дәфтәр тутырып хатлар язды аңа. Мәктәпне бетергәч Гөлфия тегүчелеккә укырга керде. Хәрби хезмәткә киткән Илдусын өзелеп көтте. Кавышырга, гомер буе бергә булырга вәгъдәләр бирештеләр, ничек кенә кыен булса да, бер-берсен ташламаска сүзләр куештылар.

Тик Илдус тиз онытты шул биргән сүзләрен. Хәрби хезмәттән исән-имин кайту хөрмәтенә өйләрендә оештырылган кичәдә үк янында бөтерелеп йөргән шаян телле Минзиләгә күзе төште аның. Әллә ничә егетнең башын берьюлы әйләндергән Минзилә егетне тиз генә үзенә өйләндереп куюның җаен тапты. Авырлымын, диде. Илдус, Гөлфия белән күрешмәс өчен, аңлатып хат язды. Шулай килеп чыкты инде, туасы бала гаепле түгел, гафу ит, диде. Гөлфиянең йөрәгенә хыянәт пычагы казадылар. Башта төн елады, көн елады. Яшисе килмәгән чаклары күп булды. Кешеләргә, дөньяга ышанычын югалтты. Сагышыннан ни тере, ни үле килеш йөргәндә язмышы аны булачак ире Сәхи белән таныштырды. Онытырмынмы әллә шуны, дип Гөлфия Сәхигә тормышка чыкты. Бәхетенә, Сәхи начар ир булмады. Хатынын, уллары Маратны үлеп яратты. Тормыш булгач, төрле чак булса да, Гөлфия бәхетсез тоймады үзен ире белән. Тәүге мәхәббәте бәгырен телеп искә еш төшсә дә, тупылдап торган улын куана-сөенә үстерде, кеше итте. Менә үткән гомеркәйләр! Марат та институтын бетереп ята. Әтисе Сәви генә озын гомерле булмады шул...

Кара әле, монитордагы Илдусның сүрәтенә төбәлеп утыра торгач, ярты төн дә җиткән! Компьютерны сүндерим дип җыенганда гына, Илдустан хат алды Гөлфия. Илдус кына әйтә белгәнчә өзекләп: “Бә-гы-рем, гафу ит мине. Мин синең алда бик гаеплемен. Минзилә мине гомер буе алдады. Балабыз булмады. Тормышыбыз тормыш түгел”, - дип язган иде ул.

Гөлфия Илдуска озак җавап бирмәде. Бер яктан беренче мәхәббәте йөрәген авырттырып үзен тагын сиздерсә, икенче яктан вөҗдан дигәне тавышсыз калмады. Ничек инде намуслы Гөлфия ир белән хатынның арасына керсен? Ни дисәң дә, Илдус хатынлы ир. Кайчандыр Илдусыннан аерган Минзиләгә барәбәрле, тиешле җавабын бирергә теләсә дә, Гөлфияне Илдус белән очрашудан нидер туктата килде.

Илдус хат артыннан хат яудырды. Әйдә очрашыйк, әйдә кавышыйк. Яшьлек хатабызны төзәтик. Без бер-беребезне сөябез, диде.

Дөресен генә әйткәндә, Гөлфиянең Илдусны бер генә булса да күрәсе бик килә иде. Күпме сораса да, Илдус үз сәхифәсендәге яшь чагындагы рәсемен алыштырмады. Очрашырга килгәч күрерсең, диде. Нинди икән ул? Үзгәргәнме икән? Күрешмәгәнгә дә чирек гасыр гомер узды. Икенчедән, үзенең Илдуска булган хисләрен сынап карыйсы, үз-үзен аңлыйсы килде аның.

Гөлфиянең тагын төн йокысы качты. Күңеле Илдусны күрергә бик теләсә дә, ул инде яшь вакыттагы самими, унҗиде яшлек акылдан язып сөйгән кызый түгел иде шул инде. Ярый әле, акылы үзендә калды. Шул акылы хәзер дә аңа тугры хезмәт итә. Тукта, тынычлан, болай ярамый, ди. Ул хәзер икенче кеше, син үлеп яраткан Илдусың түгел, ди.

Тыңлады Гөлфия акылын, ә күңеле үзенекен итте. Илдус белән бер-ике ай язышкач, алар очрашырга сүз куештылар. Илдус яшәгән шәһәргә үзе килде Гөлфия машинасы белән. Очрашырга сүз куешкан кафе алдына машинасын туктатып, аннан чыкмыйча гына көтә башлады. Урам аша җәяүлеләр сукмагыннан чыгып килүче Илдусны таныды Гөлфия, ул танымаслык үзгәрсә дә. Дулкынлануыннан ни кылырга белмичә, озак кына утырды Гөлфия, читтән генә Илдуска карап. Картайган, бирешкән, элекке егетлеген югалткан Илдуска кызганудан башка берни тоймады ул. Еллар буе күкрәген басып торган авыр тойгы әллә кая булды. Җибәрде аны яраланган мәхәббәте. Җибәрде...

 

Ә Илдус, сәгатенә ара-тирә караштырып, ярты сәгать чамасы көтеп торды да, урам буйлап атлады.

... Яхшы гына машинада утырган чибәр ханым, урам чатындагы светофорның кызыл утына туктап, тынчу-тузанлы шәһәр урамына юнәлгән, олыгаеп килгән, иңнәре аска төшкән, аксыл чәчле ирне үткәреп җибәрде дә, яшел ут янгач, ерактагы үзенә чакырып торган зәңгәр киңлеккә юл тотты...

Нравится
Комментарии (0)
Осталось символов:
Шәп укыла
  • 21 сентябрь 2019 - 20:55
    НИГЕЗ ЙОРТ Сания карчыкның бәгыренә төшкән сагыш иксез-чиксез иде. Бу сагышны бер генә үлчәмгә салып та, бер генә бизмәнгә куеп та булмыйдыр. Ул аны гүя утырган эскәмиясенә мәңгелеккә беркетеп куйган да үзе башка җаннар эзләп китеп барган. Шуңа күрәдерме, Саниянең күңеленә авыр булса да, аның җаны тыныч иде...
    2374
    1
    48
  • 22 сентябрь 2019 - 14:14
    ВӘСИЛӘ Күпләр өчен мәктәпнең ямен алып китте Вәсилә апалары. Шул китүеннән башка килә алмады Вәсилә яраткан мәктәбенә. Авыр чир утыз ике яшьлек чибәр хатынны, аяктан яздырып, урынга беркетте. Көннән көнгә сүнә барды Вәсилә, корый барды. Хастаханәдә дә аңардан тиз баш тарттылар. Үзенә берни әйтмәсәләр дә, табиблар Вәсиләнең ире Ниязны ачыктан-ачык кисәттеләр: “Без ярдәм итәрлек түгел...” Бианасы Кәримә карчык киленен им-томлап та карады. Тик Вәсиләне аягыннан еккан авыр чир китәргә килмәгән иде шул. Айлар буе ятты да ятты урында Вәсилә. Берни аңламаган биш яшьлек кызы Ләйлә белән аңардан да кечерәк улы Фәрит кенә: “Әни, тор инде. Кайчан мәктәпкә барасың?”, - дип җанын кыйдылар.
    1809
    1
    23
  • 26 сентябрь 2019 - 15:08
    ПЕРӘ Вәсил бүген дә иртә таңнан, әнисе урыныннан кузгалып кыштыр-мыштыр йөри башлауга ук, йокысыннан торып утырды. Әнә ул инде кичтән үк әзерләп куелган утыннарны мичкә тутырып, ут үрләтеп җибәргән, сыерны савып кереп, сөтен дә сөзеп куйган. Менә хәзер самавырга чиләктән су салыр, торбасына яңа өлгергән кузлы күмерләрне өстәп җибәрер. Мичтә дөрләгән ялкынга, самавыр торбасы «тәрәзәчек»ләреннән күз кыскан кузларга карап утырырга ярата ул. Улының иртәләрен әнә шулай онытылып, утларны күзәтеп утыруын әнисе сизми диярлек. Сизеп тә игътибар итмиме? Комачауламагач, ярый, утырсын инде, ихтыяры, дияме?
    1707
    0
    12
  • 10 октябрь 2019 - 16:48
    ТУКТАЛЫШ “Тизрәк! Тизрәк!..” Кыска гына мизгелгә аңына килгән Айдар үз янында кайнашкан ак халатлы кешеләрнең кем икәнлеген дә, кая ашыкканнарын да аңламыйча, бөтен тәненә таралган кискен авыртудан тагын аңын җуйды... Тукталышта юл аша чыгарга басып торганда килеп бәрелгән машинаны ул хәтерләмәде. Изелгән аякларын бот төбеннән кисәчәкләрен белми иде әле утыз тугыз яшьлек авыл укытучысы...
    1533
    2
    22
  • 17 сентябрь 2019 - 10:59
    УКЫТУЧЫЛАР КӨНЕНӘ ШИГЫРЬЛӘР Шытым салып нәни йөрәгемә, Белем дөньясына озатучы. Һәр уңышым саен сөенүче Бары Сез ул, минем Укытучым!
    1441
    0
    0

  • 23 сентябрь 2019 - 15:32
    ЖВАЧКА: "БҮГЕН МИНЕМ ТУГАН КӨН!" Бүген без көненә берәр пачка чәйни торган ЖВАЧКАның туган көне. Аңа ничә яшь дип уйлыйсыз? Ничек уйлап тапканнар? Хәзер беләбез!
    129
    0
    0
  • 27 август 2019 - 11:02
    РОССИЯДӘ ШӘП ФИЛЬМ ТӨШЕРӘ БЕЛӘЛӘР! 27нче август – Россия кинематографиясе көне. Россиядә, Совет чорында төшерелгән фильмнарга карата шикләнеп караучылар шактый, әмма син андыйлардан булсаң, бу язманы ябып куярга ашыкма, чөнки Россия кинематографиясе “Ёлки”, “Притяжение”, “Бабушка лёгкого поведения” ише чүп-чардан гына тормый. Һәм без сиңа блогер Badcomedian фикеренчә иң яхшы 5 рус телле фильм тәкъдим итәбез!
    200
    0
    2
  • TAT CULT FEST 2019
  • ПИТРАУ-2019: КАРЕНДӘШЛӘР, АРУМЫ СЕЗ?
  • ПЕЧӘН БАЗАРЫ – 2019